28 červienia
Fińkieviča ŭ Škłoŭ
Administracyja mahiloŭskaj kamendatury, dzie adbyvaje pakarańnie Artur Fińkievič, vyrašyła pakul nie vynosić chłopcu čarhovaha papiaredžańnia. Jaho mielisia vynieści za incydent, jaki adbyŭsia 25 červienia, kali chłopiec paśla adboju vyjšaŭ u susiedni pakoj pa validoł. Fińkieviča pakarali dadatkovymi pracami pa pryborcy terytoryi. Kali b papiaredžańnie było vyniesienaje, jano akazałasia b čaćviertym, i Artur moh adpravicca adbyvać pakarańnie ŭ kaloniju. Ciapier Artur pracuje ŭ vioscy Rečki (Škłoŭskaha rajonu) na budoŭlach ahrakambinatu «Zara».
Daškieviču admovili
Źmicier Daškievič paviedamiŭ svaim siabram u liście, što jamu admovili ŭ daterminovym vyzvaleńni. Kamisija pa ŭmoŭna‑daterminovym vyzvaleńni admoviła viaźniu za «šerah spahnańniaŭ za parušeńni režymu dnia i formy adzieńnia». Adnačasova palitviaźnia vyklikali na dopyt pa spravie Ivana Šyły.
2 lipienia
Zatrymali ŭ Budsłavie
U Budsłavie, dzie prachodziła štohadovaja pilihrymka, za zbor podpisaŭ byli zatrymanyja 14 aktyvistaŭ Kampanii za źmienu zakonu pra svabodu sumleńnia. Zatrymanyja miascovaj milicyjaj dy supracoŭnikami KDB pa Miensku i Mienskaj vobłaści aktyvisty praviali kala troch hadzinaŭ u Budsłaŭskim RUUS. Milicyjanty skanfiskavali kala 500 asobnikaŭ «Vieśnika» Kampanii ŭ abaronu prava na svabodu sumleńnia. Na adnaho z kaardynataraŭ Kampanii Siarhieja Łukanina byŭ składzieny pratakoł.
Azarka vyviesiła
Nastu Azarka zatrymali a 23‑j hadzinie paśla taho, jak jana pasprabavała vyviesić bieł‑čyrvona‑bieły ściah pobač ź Niaśviskim rajvykankamam. Jaje pratrymali ŭ pastarunku noč i adpuścili a 12‑j. Byŭ składzieny pratakoł ab administratyŭnym parušeńni.
3 lipienia
Zatrymańni moładzi BNF
A 15‑j hadzinie byŭ zatrymany lider moładzi Partyi BNF Aleś Kalita, jaki sprabavaŭ dapamahčy vyrvacca ź milicejskaha atačeńnia aktyvistcy Naście Aleksandrovič.
Zatrymali abaroncaŭ Horadni
Aktyvistaŭ ruchu ŭ abaronu histaryčnaj spadčyny Horadni zatrymali na vuł. Savieckaj. Siarod zatrymanych byli Aleś Zaleŭski, Franak Viačorka, Viktoryja Vołkava, Siarhiej Kulik, Alaksandar Miliniec, Vital Izotaŭ, Mikoła Žukoŭski. Za raspaŭsiud ulotak zatrymali Alenu Dyjaninu. Moładź trymała raściažku i dziciačyja cacki: rydloŭki dy ekskavatar. Rychtavaŭsia performans. Ad 30 červienia ŭ Horadni ładzicca letnik «Haradzienskaja fartecyja». Jaho ŭdzielniki zajmajucca raspaŭsiudam infarmacyi pra chod rekanstrukcyi Staroha horadu, dziažurać pobač z budynkami, zaplanavanymi pad znos.
Chadekaŭ trasuć
Na kvatery siabraŭ inicyjatyvy «Biełaruskija chryścijanskija demakraty» pa vulicy Puškina ŭ stalicy adbyŭsia pieratrus. Supracoŭniki KDB i milicyi zajavili, što zabiaruć z saboj dla pravierki kamputary i ŭsie nośbity infarmacyi. U kvatery taksama byli blanki dla zboru podpisaŭ za źmienu Zakonu ab relihii.
