Na sajcie KDB Biełarusi źjaviŭsia analityčny artykuł, vyłučany ŭ asobny raździeł, z hroznaj nazvaj «KDB papiaredžvaje».
U im havorycca pra abaronu dziaržaŭnych sakretaŭ. KDB kanstatuje ŭstojlivaść intaresu zamiežnych specsłužbaŭ da Biełarusi. Hetamu dajecca ekanamičnaje tłumačeńnie.
Hałoŭnym čyńnikam takoj zacikaŭlenaści nazyvajecca «imknieńnie asobnych zamiežnych dziaržavaŭ atrymać dostup da źviestak ekanamičnaha i vajskova‑stratehičnaha charaktaru». «Asablivuju vastryniu hetyja sproby nabyvajuć pa miery intehracyi respubliki ŭ suśvietnuju ekanomiku i z raźvićciom joju adnosinaŭ dobraha susiedztva z upłyvovymi zamiežnymi partniorami. U asobnych vypadkach dla niedapuščeńnia Biełarusi na rynki śvietu zamiežnyja kankurenty vykarystoŭvajuć mahutny finansavy patencyjał».
Aŭtary hetaha analityčnaha dakumentu pišuć:
«Orhany dziaržaŭnaj biaśpieki ŭsio čaściej sutykajucca z faktami, kali pradstaŭniki zamiežnych firmaŭ sprabujuć vykarystoŭvać padryŭnyja metady... Siarod inicyjataraŭ padobnych dziejańniaŭ — niekatoryja zamiežnyja dziaržavy, a taksama zamiežnyja pryvatnyja struktury, kankurenty biełaruskich subjektaŭ haspadarańnia na ŭnutranym i suśvietnym rynkach. Jak praviła, u roli vykanaŭcaŭ hetych akcyj vystupajuć dziaržaŭnyja specsłužby i specyjalnyja padraździaleńni bujnych karparacyjaŭ, u skład jakich uvachodziać byłyja supracoŭniki vyviedčych orhanaŭ, a taksama dziejnyja raźviedčyki, što pracujuć pad prykryćciom. Takija struktury stvoranyja, naprykład, u niekatorych zamiežnych naftavych firmach, avijakampanijach».
Varta zaŭvažyć, što z zamiežnych naftavych firmaŭ u Biełarusi pradstaŭlenyja tolki rasiejskija. Vychodzić, što dziejnaść KDB Biełarusi siońnia ŭžo skiravanaja ŭ tym liku na procidziejańnie ŭpłyvu rasiejskich karparacyj na pracesy ŭ Biełarusi.
«Ciapieraka hałoŭnuju ŭvahu zamiežnyja specsłužby nadajuć pracesu stanaŭleńnia Respubliki Biełarusi jak samastojnaje dziaržavy, jaje zamiežnaj palitycy, asabliva ŭ častcy vybaru stratehičnych partnioraŭ, ‑‑ havorycca ŭ artykule. ‑‑ Nastupstvami biespakaranaj dziejnaści zamiežnych specsłužbaŭ pa zdabyćci sakretnych materyjałaŭ mohuć stać uzmacnieńnie supraćdziejańnia zamiežnapalityčnamu kursu Respubliki Biełarusi, padryŭ jaje ekanomiki šlacham uciahvańnia ŭ stratnyja handlova‑ekanamičnyja hiešefty, nieracyjanalnuju vajskova‑techničnuju supracu, razhortvańnie navukova‑daśledčych pracaŭ u tupikovych kirunkach, naviazvańnie biełaruskamu boku kantraktaŭ na pastaŭku sastarełych i ekalahična škodnych vytvorčaściaŭ i technalohij».
Tak i prosicca na jazyk pytańnie, ci adnosicca da sastarełych i ekalahična škodnych rasiejskaja technalohija AES?
Za ŭ mnohim savieckaj, špijonamanskaj stylistykaj artykułu prasočvajucca novyja razumieńni nacyjanalnych inatresaŭ Biełarusi.
