Vydańnie, jakoje bolš za miesiac tamu z‑za niedachopu srodkaŭ časova prypyniła vychad u typahrafskim varyjancie, hetkim čynam sprabuje zachavać suviaź sa stałymi čytačami.
Pavodle dyrektarki Zakrytaha akcyjanernaha tavarystva Vydaviecki dom «Vitiebskij kuŕjer» Žany Papovaj, da raspracoŭki internet‑viersii prymusili tyja žorstkija ŭmovy, u jakich apynułasia vydańnie. Haziecie admovili ŭ padpiscy i ŭ raspaŭsiudzie praz šapiki «Abłsajuzdruku». Niemahčymym stała supracoŭnictva z abłasnoj drukarniaj. A drukavańnie u Smalensku i pieramiaščeńnie nakładu praź miažu na terytoryju Biełarusi pryviadzie nie tolki da značnaha padvyšeńnia sabiekoštu vydańnia, ale i da tych prablemaŭ, ź jakimi ŭžo nieadnarazova sutykalisia, naprykład, niedziaržaŭnyja «Narodnaja vola» ci «Tovariŝ» (zatrymańni nakładu).
Sajt www.kurier.vitebsk.by isnavaŭ i raniej, ale davaŭ adno PDF‑viersiju numaroŭ haziety i niekalki miesiacaŭ nie abnaŭlaŭsia. Zaraz heta budzie samastojnaje vydańnie, sa svaim redaktaram i techničnymi supracoŭnikami. Kalektyŭ žurnalistaŭ zastaniecca ŭ značnaj stupieni tym ža, jak i ŭ haziecie, i pašyracca budzie chiba što za košt maładych talentaŭ dy aŭtaraŭ z roznych kutkoŭ Viciebščyny.
Pieryjadyčnaść abnaŭleńnia pakul zachavajecca takaja samaja, jak i ŭ papiarovaha vydańnia, — dva razy na tydzień. Krychu paźniej płanujecca pierajści da štodzionnaha aśviatleńnia padziejaŭ.
