Supracoŭniki KDB vyklikali na razmovy niekalkich zatrymanych raniej moładzievych aktyvistaŭ kampanii «Vyratujem Horadniu». Im raili admovicca ad udziełu ŭ vuličnych akcyjach. Junakoŭ pałochali tym, što jany nia zmohuć navučacca i pracavać u krainie.
Haradzienca Ściapana Śvidzierskaha na administracyjnaj kamisii rajvykankamu aštrafavali na 40 bazavych vieličyniaŭ. Pavodle milicyjantaŭ i supracoŭnikaŭ harvykankamu, jon sapsavaŭ vyhlad horadu nalepkami z zaklikam spynić razbureńnie histaryčnaj častki Horadni.
Franak Viačorka ŭ Miensku musić naviedać administracyjnuju kamisiju Savieckaha rajvykankamu. Jaho zatrymlivali razam sa Ściapanam.
Havoryć aktyvist kampanii «Vyratujem Horadniu» Aleś Zaleŭski:
«U hetych akcyjach udzielničała šmat moładzi, jakaja raniej nie była zaanhažavanaja ŭ palityčnym žyćci. Jany dałučylisia da abarony. Ciapier, na žal, dziaŭčat i chłopcaŭ pačali vyklikać na razmovy ŭ roznaha kštałtu struktury.
Niekalki takich razmovaŭ adbyłosia ŭ KDB, a taksama ŭ milicyi, u adździełach pa spravach niepaŭnaletnich. Ich pałochali, što jany patrapili ŭ niejki śpis, što ciapier ich budučynia pierakreślenaja — jany nikudy nie pastupiać vučycca i nie ŭładkujucca na pracu».
Siabry ruchu «Za Svabodu» i aktyvisty kampanii «Vyratujem Horadniu» stvaryli kamitet, jaki budzie nazirać za pracesami nad moładzievymi aktyvistami i dapamahać im.
U haradzienskich akcyjach brali ŭdzieł moładzievyja aktyvisty z roznych ruchaŭ i niefarmalnych arhanizacyjaŭ. Moładzievaja aktyvistka Partyi BNF Nata Sienina vykazała «Svabodzie» svajo mierkavańnie:
«Ułady vielmi zakłapočanyja. Jany nie čakali, što moładź tak aktyŭna adhukniecca na takuju nie zusim aktualnuju dla moładzi prablemu, jak histaryčnaja spadčyna, histaryčnyja kaštoŭnaści… Da taho ž, leta, kali moładź musić być u raźjezdach, na adpačynku. Ułady bajacca palityčna aktyŭnaj moładzi, tym bolš, što napieradzie nas čakaje bolš aktyŭnaja vosień. Heta j akcyja suprać admieny lhotaŭ, i eŭrapiejski marš «Za Svabodu», u padrychtoŭcy jakoha moładź biare aktyŭny ŭdzieł».
Niekalki moładzievych aktyvistaŭ atrymali pozvy ŭ milicyju j vykliki na pasiedžańni administracyjnych kamisijaŭ pavodle miesca žycharstva. Jany pavinny źjavicca tudy na praciahu tydnia.
