Sud Čyhunačnaha rajona Viciebska 7 lipienia aštrafavaŭ miascovaha apazicyjaniera Barysa Chamajdu na 10 bazavych vieličyń (310 tys. rubloŭ) za praviadzieńnie niesankcyjanavanaha pikieta.
B.Chamajda vyjšaŭ u centr horada, dzie ŭ hetyja dni prachodzić fiestyval mastactvaŭ «Słavianski bazar», z płakatam, pryśviečanym 125-hoddziu z dnia naradžeńnia kłasika biełaruskaj litaratury Janki Kupały. Na płakacie, upryhožanym nacyjanalnym biełaruskim arnamientam, byli napisany radki z kupałaŭskaha vierša «Chaj ža vam tak nie zdajecca»: «Chaj ža vam tak nie zdajecca, što biada ŭžo i zaciśnie. Znajcie, licha pieratrecca, i małankaj dola bliśnie». U rukach B.Chamajda trymaŭ śviežy numar haziety «Naša Niva», nadrukavany da jubileju biełarusskoho pieśniara, dzie na pieršaj staroncy źmieščana vialikaja fatahrafija Ja.Kupały.
Prykładna praz 50 chvilin apazicyjanier byŭ zatrymany milicyjaj. Sud uhledzieŭ u dziejańniach B.Chamajdy niezakonnaje pikietavańnie.
«U hetym vidać kryvadušnaść uładaŭ: na aficyjnym uzroŭni jany šmat havorać pra Kupału, ale pry hetym karajuć za płakat ź jaho čatyrochradkoŭjem, - adznačyŭ aktyvist apazicyi ŭ intervju BiełaPAN. - Hetym płakatam ja chacieŭ pryciahnuć uvahu ludziej da hetaj značnaj dla biełarusaŭ daty. A to ludzi na «Słavianskim bazary» jaduć piražki, šašłyki, pjuć piva i nie zadumvajucca ni ab čym... Kupała napisaŭ hety vierš jašče ŭ 1906 hodzie, ale toje, pra što jon kazaŭ, abaviazkova ździejśnicca».
 Barys Chamajda. Fota Jana Tałpyhi |
