 Uładzimier Choład |
9 lipienia śledčym hałoŭnaha ŭpraŭleńnia papiaredniaha rasśledavańnia MUS Biełarusi vystaŭlena abvinavačańnie adkaznamu rabotniku Administracyi prezidenta – pieršamu namieśniku načalnika hałoŭnaha ideałahičnaha ŭpraŭleńnia – načalniku ŭpraŭleńnia pa kaardynacyi ideałahičnaj pracy Uładzimiru Choładu. Pra heta BiełaPAN paviedamili ŭ milicejskim viedamstvie krainy.
Uładzimir Choład abvinavačvajecca va ŭčynieńni machlarstva ŭ asabliva bujnym pamiery i padbuchtorvańni da davańnia chabaru ŭ bujnym pamiery. U dačynieńni da jaho abranaja miera strymańnia ŭ vyhladzie ŭziaćcia pad vartu.
U MUS taksama paviedamili, što U. Choład byŭ zatrymany supracoŭnikami milicyi ŭ jakaści padazronaha 30 červienia.
Pra toje, što U.Choład byŭ zatrymany ŭ momant atrymańnia chabaru ŭ 35 tysiač dołaraŭ, pieršym paviedamiŭ 6 lipienia interniet-resurs «Biełorusskij partizan».
Tady ŭ Hienieralnaj prakuratury, Ministerstvie ŭnutranych spraŭ i Kamitecie dziaržaŭnaj biaśpieki Biełarusi BiełaPAN zajavili, što nie vałodajuć infarmacyjaj ab hetym. A ŭ Administracyi prezidenta paviedamili, što U. Choład znachodzicca ŭ kamandziroŭcy.
Pikantnaść sytuacyi ŭ tym, što U. Choład jašče i člen Centravybarkamu. Jon byŭ złučvom pamiž Administracyjaj i viedamstvam spn. Jarmošynaj.
Nia vyklučana, što aryšt U. Chołada paciahnie za saboj adstaŭku jahonaha šefa, kiraŭnika idealahičnaha ŭpraŭleńnia Aleha Pralaskoŭskaha. Raniej u łukašenkaŭskaj kadravaj praktycy nia raz śledam za vykryćciom karupcyi ŭ viedamstvie išła adstaŭka jahonaha kiraŭnika. Varta adznačyć, što A. Pralaskoŭski maje adyjoznuju reputacyju ŭ vačach niezaležnaha hramadztva. Zabarona niezaležnaj presy i likvidacyja biełaruskich kulturnych arhanizacyj źviazvajucca ź jahonym imiem.
Źviartaje ŭvahu toj fakt, što U. Chołada zatrymali supracoŭniki MUS, tady jak A. Pralaskoŭski pachodzić z KDB. Naziralniki źviartajuć uvahu na vajnu aryštaŭ, što razharnułasia miž dvuma hetymi viedamstvami.
