Sustaršynia arhkamiteta pa stvareńni partyi «Biełaruskaja chryścijanskaja demakratyja» (BCHD) Pavieł Sieviaryniec 9 lipienia naviedaŭ Homiel. Jon sustreŭsia z demakratyčnym aktyvam i rehijanalnymi kaardynatarami arhkamiteta pa stvareńni BCHD.
Jak paviedamiŭ BiełaPAN P.Sieviaryniec, asnoŭnaja meta jaho pajezdki - znajomstva z demakratyčnymi aktyvistami rehijona.
Hałoŭnaj zadačaj arhkamiteta pa stvareńni BCHD P.Sieviaryniec ličyć zhurtavańnie biełaruskich viernikaŭ roznych kanfiesij. «Naša siła - u viery, u lubovi da Boha i svajoj Radzimy. Padmanu, dyktatury i nianaviści my možam supraćstajać tolki vieraj. My vierym u pieramohu i ličym, što, abjadnaŭšy viernikaŭ, za niekalki hadoŭ zmožam uźniać krainu. Apazicyja, jakaja zmahajecca za ŭvieś narod, vyjhrać nie moža ŭ baraćbie suprać režymu. Ale kali z režymam zmahajecca sam narod - režym asudžany», - zajaviŭ P.Sieviaryniec.
Maładym aktyvistam palityk paviedamiŭ ab svaim znachodžańni na pasialeńni ŭ vioscy Małoje Sitna ŭ Viciebskaj vobłaści i ab pracy, praviedzienaj siarod miascovaha nasielnictva za dva hady abmiežavańnia voli. Palityk pradstaviŭ udzielnikam svaju novuju knihu «Bratu».
«Siońnia adna z zadač - padchapić toj supraciŭ, što idzie z hłybini naroda. Patrebna takaja partyja, jakaja padtrymaje hety pratest i arhanizuje ludziej. Dumaju, u BCHD jość usie šancy stać takim źvianom, jakoje arhanizuje, - i pamiž ludźmi, i pamiž roznymi partyjami», - ličyć P.Sieviaryniec.
Na hetym tydni palityk płanuje naviedać rajonnyja centry Homielskaj vobłaści Mazyr, Śvietłahorsk, Žłobin i Rečycu.