Hramadski arhkamitet pa ŭviekaviečańni pamiaci achviaraŭ stalinizmu źviarnuŭsia ŭ Homielski rajvykankam z prapanovaj uklučyć navukoŭcaŭ u skład dziaržaŭnaj kamisii pa identyfikacyi materyjałaŭ raskopak va ŭročyščach Try Słupy i Barki na terytoryi Prybytkoŭskaha sielsavieta Homielskaha rajona. Pra heta 9 lipienia na pasiadžeńni arhkamiteta paviedamiŭ jaho sakratar Uładzimir Ramanoŭski.
U liście na imia namieśnika staršyni rajvykankama - staršyni kamisii pa daśledavańni i pierapachavańni astankaŭ, znojdzienych u niezarehistravanych mohilnikach, Natalli Aksionavaj arhkamitet prapanavaŭ uklučyć u skład kamisii dvuch navukoŭcaŭ - kandydata histaryčnych navuk Anatola Vałachanoviča ź Minska i kandydata histaryčnych navuk dacenta Homielskaha dziaržaŭnaha univiersiteta imia F.Skaryny Aleha Makušnikava. Apošni, pavodle słoŭ U.Ramanoŭskaha, braŭ udzieł u abśledavańni masavaha pachavańnia achviaraŭ stalinizmu, znojdzienaha ŭ siaredzinie 1990-ch hadoŭ niepadalok ad miesca ciapierašnich raskopak.
U.Ramanoŭski nahadaŭ, što padčas raskopak z 6 maja pa 11 červienia ŭ lesie na 9-m kiłamietry šašy Homiel - Čarnihaŭ 52-i asobny pošukavy bataljon upraŭleńnia ŭviekaviečańnia pamiaci abaroncaŭ Ajčyny i achviaraŭ vojnaŭ Ministerstva abarony znajšoŭ astanki 70 čałaviek. Pavodle śviedčańniaŭ miascovych žycharoŭ, u hetym rajonie ŭ pieradvajennyja hady supracoŭniki NKUS učyniali masavyja pakarańni śmierciu achviaraŭ stalinizmu, u tym liku žycharoŭ Ukrainy. Pavodle słoŭ U.Ramanoŭskaha, viersiju ab rasstrełach supracoŭnikami NKUS paćvierdziła niezaležnaja ekśpiertyza hilzaŭ ź pistaleta sistemy «Nahan», znojdzienych u pachavańniach.
Udzielniki pasiadžeńnia padtrymali prapanovu staršyni RHA «Biełaruskaje dobraachvotnaje tavarystva achovy pomnikaŭ historyi i kultury» Antona Astapoviča ab ustupleńni ŭdzielnikaŭ arhkamiteta ŭ Minskaje haradskoje adździaleńnie tavarystva. U jaho miežach na pravach siekcyi arhkamitet zmoža vieści pošuk i miemaryjalizacyju miescaŭ masavych pakarańniaŭ achviaraŭ stalinizmu, a taksama chadajničać ab uniasieńni hetych pomnikaŭ u Dziaržaŭny śpis historyka-kulturnych kaštoŭnaściej Respubliki Biełaruś.
