Pradukcyja, jakuju majuć vypuścić da zimy, užo raskuplenaja napierad.
Kompleks haračakatanych biasšvovych trubaŭ na bazie Biełaruskaha metalurhičnaha zavodu pabudavali mienš, čym za dva hady. Heta ŭdvaja chutčej, čym u Kitai, paviedamiŭ hieneralny dyrektar vytvorčaha abjadnańnia Mikałaj Andryjanaŭ na pres-kanferencyi, pryśviečanaj Dniu metalurha.
Dziela hetaha z dazvołu Saŭminu daviałosia vieści paralelna prajektavańnie, uźviadzieńnie kompleksu i mantažavańnie abstalavańnia. Prajekt kaštavaŭ $270 młn. 80% abstalavańnia impartavana ź Niamieččyny. Zaplanavanaja mahutnaść vytvorčaści – da 250 tys. ton trubaŭ u hod.
Popyt na novuju pradukcyju BMZ vysoki: truby, jakuju majuć vyrabić da zimy, užo raskuplenyja napierad. Heta dazvolić skaracić termin akupalnaści prajektu na hod. 88% adsotkaŭ trubaŭ pradaduć za miažu, ź ich tolki 26% u Rasieju.
Pavodle kiraŭnika abjadnańnia, kiraŭnictva rasiejskaj Abjadnanaj trubnaj kampanii naviedałasia ŭ Žłobin i pa vynikach vizytu prapanavała svajo pasiarednictva ŭ prodažy biełaruskaj pradukcyi, adnak atrymała admovu. «My majem dobruju kanjukturu na zachodnim rynku i pakul nia bačym patreby pieraaryjentacyi na Ŭschod» – padkreśliŭ M.Andryjanaŭ. Novy kompleks maje zabiaśpiečyć kala 5% suśvietnaha popytu na biasšvovyja truby. Takaja pradukcyja zapatrabavanaja ŭ naftachimičnaj, mašynabudaŭničaj pramysłovaści, u kamunalnaj haspadarcy.
U chodzie pres-kanferencyi kiraŭnik BMZ padziakavaŭ prezydentu za «mudraje rašeńnie abjadnać metalurhičnyja pradpryjemstvy Biełarusi ŭ adzin kompleks». Ad studzienia 2006 h. Vytvorčaje abjadnańnie «Biełaruski metalurhičny zavod» złučyła ŭ sabie RUP «Biełaruski metalurhičny zavod» (Žłobin), AAT «Mahiloŭski metalurhičny zavod», RUP «Rečycki zavod metałavyrabaŭ», AAT «Zavod šviejnych mašynaŭ» (Vorša). Pa słovach kiraŭnika abjadnańnia M. Andryjanava, takoje hurtavańnie dała za paŭtara hodu sumiesnaj dziejnaści $12,5 miljonaŭ dadatkovaha prybytku.
U 2006 h. naziraŭsia rost vytvorčaści ŭ pamiery 15% u paraŭnańni z 2005 h. Supolna było vypuščana pradukcyi na $1,17 młrd, ź ich na žłobinski zavod prypała $1,08 młrd, na rečycki $60 młn i na mahiloŭski $30 młn. Pa vynikach 2007 h. planujecca vyrab pradukcyi na sumu $1,5 młrd, ź jakich $1,4 młrd składzie dola žłobinskaha BMZ.
Ciaham pieršaha paŭhodździa biahučaha hodu rost ekspartu pradukcyi skłaŭ 141%, abjom prodažaŭ vyras na 48%, prybytak ad realizacyi vyras udvaja, čysty prybytak – utraja.
Prybytak na adnaho pracaŭnika pradpryjemstva składaje kala $120 tysiačaŭ. Na siońnia, naprykład, Rečycki zavod metałavyrabaŭ vypuskaje abjom pradukcyi paraŭnalny z abjomam 16 analahičnych rasiejskich pradpryjemstvaŭ i ŭtraja bolš, čym usie ŭkrainskija kankurenty.
Siarod kryteraŭ pośpiechu pradpryjemstva na tle istotnaha padaražańnia enerharesursaŭ, hiendyrektar BMZ nazvaŭ spryjalnuju kańjukturu na suśvietnych rynkach (miž inšym, vajna ŭ Iraku pryniesła dadatkovy prybytak ŭ pamiery 600 tys. eŭra), mižnarodny aŭtarytet, jakaść pradukcyi biełaruskich vytvorcaŭ. «My pradajem svaju pradukcyju daražej, čym rasiejcy, ci ŭkraincy dziakujučy viadomaści našaha brendu» – paviedamiŭ jon. Naładžanyja kantakty Žłobinskaha metalurhičnaha zavodu napoŭnicu vykarystoŭvajucca ciapier i mahiloŭskimi i rečyckimi vytvorcami. Hałoŭnymi kankurentami Mikałaj Andryjanaŭ nazvaŭ kitajcaŭ, jakija, na jaho dumku, pracujuć lepš za eŭrapejcaŭ.
U Rasiei samy «małady» metalurhičny zavod adčynili 30 hadoŭ tamu, adznačyŭ jon. Hiendyrektar padkreśliŭ, što chutki pierachod da suśvietnych cenaŭ na enerhanośbity budzie tolki na karyść ajčynnym vytvorcam: «Hodzie žyć na chalavu, my nia horšyja za Zachad, jaki daŭno pracuje ŭ takich umovach».
