Najbližejšym časam u Horadni projdzie schod inicyjatyŭnaj hrupy pa praviadzieńni referendumu, śviatkavańnie uhodkaŭ Hrunvaldu, čarhovy plener «Lehiendy ź piasku» dy kancert Pamidorava.

26 lipienia ŭ Horadni adbudziecca schod inicyjatyŭnaj hrupy pa praviadzieńni haradzkoha referendumu, pryśviečanaha prablemam rekanstrukcyi Staroha horadu. Heta kančatkovaja data, paviedamiŭ adzin ź inicyjataraŭ referendumu Vadzim Sarančukoŭ. Schodu budzie papiaredničać pasiedžańnie ekspertnaj rady, jakoje adbudziecca 11 lipienia. Siabry rady jašče raz detalova vypracujuć pytańni, što prapanujecca vynieści na haradzki referendum.

Tym časam hramadzkaje žyćcio ŭ Horadni nie zacichaje. 13 lipienia zaplanavany kruhły stoł z udziełam historykaŭ, pryśviečany čarhovaj hadavinie Hrunvaldzkaj bitvy. Na vychodnyja haradziency tradycyjna pryjduć da Kałožy, kab ŭskłać kvietki da kamienia z vyjavaj Pahoni i nadpisam «Na Hrunvald».

U ramkach kampanii «Muzyki suprać razbureńnia Horadni» 17 lipienia adbudziecca kancert Alaksandra Pamidorava.

Henik Łojka miarkuje zładzić čarhovy plener «Lehiendy ź piasku», jaki maje nazvu «Chrystos pryziamliŭsia ŭ Harodni». «Pakul što ŭ Horadni «nialotnaje» nadvorje, tamu na siońnia majem dźvie vierajemnyja daty adkryćcia pleneru — 15 i 22 lipienia» — raspavioŭ mienski skulptar. Pavodle zadumy sp. Łojki, piasčanaja postać Chrysta laža nicma pad Kałožaju na tym adchonie, što koliś abrynuŭsia ŭ Nioman, kab z carkvoju‑lehiendaj bolš nikoli nia zdaryłasia biady».

Tak musiła vyhladać skulptura Chrysta pad Kałožaj. Adnak uličvajučy niebiaśpieku apaŭzańnia plastu ziamli, jaje stvorać u inšym miescy.

Fota Henika Łojki

Клас
0
Панылы сорам
0
Ха-ха
0
Ого
0
Сумна
0
Абуральна
0