Nieabchodnaj umovaj dla hetaha źjaŭlajecca najaŭnaść nie mienš čym 10 zajaŭ ad baćkoŭ z prośbaj uklučyć ich dziaciej u skład hetaj hrupy. Hrupa pryznačana dla naviedvańnia dziaciej va ŭzroście ad dvuch da čatyroch hadoŭ.
Inicyjatyva pa stvareńni biełaruskamoŭnaj hrupy naležyć Mahiloŭskaj haradskoj arhanizacyi HA «Tavarystva biełaruskaj movy imia Franciška Skaryny» i haradskoj arhanizacyi Partyi BNF.
«Źjavilisia zaŭziatyja baćki, jakija žadajuć, kab ich dzieci razmaŭlali pa‑biełarusku, — zaznačyŭ u intervju BiełaPAN člen inicyjatyŭnaj hrupy baćkoŭ Źmicier Sałaŭjoŭ. — Na hety momant u Mahilovie nie isnuje nivodnaha biełaruskamoŭnaha sadka. My abyšli ŭsie sadki, u tym liku tyja, dzie raniej byli biełaruskamoŭnyja hrupy, ale, na žal, nivodnaj hrupy nie zastałosia. Z adnym sadkom my pajšli na pieramovy. Zahadčyca pajšła nasustrač i pahadziłasia adkryć na bazie svajho sadka biełaruskamoŭnuju hrupu, bo raniej u hetym sadku ŭžo isnavali takija hrupy i ŭ ich zachavalisia biełaruskija materyjały i vychavacieli, jakija viedajuć biełaruskuju movu».
Z.Sałaŭjoŭ skazaŭ, što ŭžo pačaŭsia nabor u hetuju hrupu, i niekatoryja baćki ŭžo padali tudy zajavy. Miascovaje telebačańnie padtrymała inicyjatyvu baćkoŭ i prapanavała dapamahčy im ŭ rekłamnaj kampanii pa zaprašeńni dziaciej u biełaruskamoŭnuju hrupu.
«Haradskija ŭłady, — zaznačyŭ Z.Sałaŭjoŭ, — pazityŭna staviacca da našaj inicyjatyvy. My byli ŭžo ŭ abłana, i tam nie vykazali ničoha suprać našaha žadańnia».
Kali nabiarecca nieabchodny minimum z 10 čałaviek, hrupa budzie ŭkamplektavanaja i pačnie svaju pracu 1 vieraśnia.
Akramia hetaha, miascovyja aktyvisty viaduć pieramovy ź miascovymi škołami i abłasnym adździełam adukacyi ab adkryćci biełaruskamoŭnych kłasaŭ, jakich taksama niama ŭ Mahilovie.