Hutarka francuskaha žurnalista z Łukašenkam 10 lipienia nahadała mnie epizod 15-hadovaj daŭniny.
Ale spačatku zaznaču, što ŭčora mśjo Šatło z "Mond" musiŭ vyjavić hraničnuju dyplamatyčnaść, kali jaho atačyła biełaruskaja dziaržaŭnaja presa. Maŭlaŭ, z vašym aficyjnym lideram "atrymałasia praciahłaja dy cikavaja hutarka", "pierakanany, što ŭ Eŭropie isnuje intares da Biełarusi", "choć Biełaruś i eŭrapiejskaja kraina, ab joj nia tak šmat havorać u Eŭropie" — taki voś nabor padkreślena palitkarektnych vykazvańniaŭ.
Miž tym francuski hazetny voŭk padčas vandroŭki ŭ "apošniuju dyktaturu" pakazaŭ prafesijny spryt i paralelna zrabiŭ interviju ź Milinkievičam. Tak što čytačy "Mond", treba dumać, atrymajuć nie zusim adnabokaje ŭjaŭleńnie pra siońniašniuju Biełaruś. Chacia ŭsio adno... Kładučy ruku na serca, ajčynnaja palityčnaja specyfika nastolki ekzatyčnaja dla supolnaści stałych demakratyj, što tamtejšaja presa piša pra nas pieravažna ŭ płaščyni "ŭłada — apazycyja". I pa vialikim rachunku naša kraina zastajecca dla žychara staroj Eŭropy toj samaj "tera inkohnita", jak heta było na pačatku dzievianostych.
U 1992 hodzie padčas vandroŭki pa Francyi mnie daviałosia trapić i ŭ redakcyju "Mond". Ichni MZS daŭ hida-pierakładčycu, što było nia lišnim pry maim ścipłym viedańni movy Hiuho i Mapasana.
Adnak i hetaj viedy chapiła, kab zrazumieć pieršuju frazu haspadara kabineta, adrasavanuju suajčyńnicy-pierakładčycy. "Musić, rasiejcy i biełarusy — adno i toje ž ("...la mem šoz")?" — napaŭhołasa pacikaviŭsia pradstaŭnik redakcyjnaha kiraŭnictva, pierš čym raspačać dyjaloh z hościem.
Ja — kajusia! — nia vytryvaŭ i vydaŭ siabie. Nia viedaju, ci etyčna heta vyhladała, ale ž ustaviŭ try hrašy: patłumačyŭ źbiantežanamu surazmoŭcu, što biełarusy i rasiejcy — usio ž nie zusim "la mem šoz":-)
Paśla maleńkaj ustupnaj lekcyi:) my vielmi dobra pahavaryli, i nijakaj kryŭdy ja nie adčuvaŭ. Francuzy, uklučna ź intelektuałami (chiba što akramia žmieni vuzkich admysłoŭcaŭ), sapraŭdy byli ni ŭ zub nahoj. Na kožnym kroku davodziłasia davać tłumačeńni na tym ŭzroŭni, što zahadkavaja Bélarus — heta ŭčorašniaja savieckaja la Biélorussie.
A voś zaraz, praz paŭtara dziesiacihodździ, sapraŭdy prykra ŭśviedamlać, što kraina zastajecca dla Staroha Śvietu čornaj dzirkaj. Čaho chacieć ad zachodnikaŭ, kali ajčynnaje kiraŭnictva ćvierdzić pra "rasiejcaŭ sa znakam jakaści"! Mo' kaho hety "znak" i hreje, ale, musić, nie balšyniu naviednikaŭ sajtu "NN".
P.S. Na žal, šanoŭnaja "Mond" i siońnia ŭžyvaje saŭkovy varyjant nazovu — la Biélorussie. Musić, zabyłasia ŭžo maja lekcyja:)
