U Homieli asudzili hrupu rekieciraŭ, jakaja składałasia z členaŭ adnoj siam'i.
Sapraŭdnuju siamiejnuju «bryhadu», jakaja pavinna była ščyravać na złačynnaj nivie, arhanizavaŭ žychar Homiela Juryj Karniejeŭ. Pryčym sam «pachan» znachodziŭsia za kratami...
Jak paviedamiła načalnik upraŭleńnia infarmacyi i hramadskich suviaziaŭ MUS krainy Kaciaryna Samusienkava-Šelehava, Juryj Karniejeŭ trapiŭ u pole zroku pravaachoŭnych orhanaŭ niekalki hadoŭ tamu. Pavodle źviestak Ministerstva ŭnutranych spraŭ, svaje afiery jon raspačaŭ jašče ŭ vierasni 2004 hoda. Źjaŭlajučysia na toj čas pradstaŭnikom zasnavalnika firmy «Dełtabud», sumiesna z kiraŭnikami inšych pryvatnych pradpryjemstvaŭ, Juryj Karniejeŭ padmannym šlacham zavałodaŭ srodkami RUP VA «Biełaruśkalij» i Salihorskaha harvykankama. U pryvatnasci, vykarystoŭvajučy falšyvyja dakumienty na nabyćcio budmateryjałaŭ, machinatar razam sa svaimi chaŭrusnikami prysvoiŭ bolš za 116 miljonaŭ rubloŭ. Supracoŭniki ŭpraŭleńnia pa baraćbie z ekanamičnymi złačynstvami (UBEZ) MUS Biełarusi vyjavili i zatrymali prajdziśvieta. Adnak, navat znachodziačysia ŭ minskim śledčym izalatary, Karniejeŭ praciahvaŭ vynošvać złačynnyja płany. Jon vyrašyŭ stvaryć bandu rekieciraŭ na bazie svajoj siam'i. Dakładnyja instrukcyi, u jakich byŭ paznačany płan złačynnaj dziejnasci, źviestki pra budučyja achviary i navat ukazańnie, jakim čynam rasparadžacca atrymanymi šlacham vymahańnia hrašyma, jon zapisaŭ na papiery i pieradaŭ sukamierniku, jaki pavinien byŭ nieŭzabavie vyjsci na volu. Paśla vyzvaleńnia sa śledčaha izalatara były tavaryš pa niaščaściu sustreŭsia z žonkaj Karniejeva i taja, atrymaŭšy instrukcyi, adrazu pačała ich ažyćciaŭlać. Razam z synam i śviokram jana sfarmiravała «bryhadu» rekieciraŭ. Praŭda, členy siamiejnaj bandy ŭziali na siabie tolki padrychtoŭčuju pracu. Niepasredna vymahańniem pavinien byŭ zajmacca toj samy «kurjer», jaki prynios z SIZA instrukcyi ad Juryja Karniejeva. Kolišniaha sukamiernika «pachana» ŭzbroili da zuboŭ. U jahonym arsienale apynulisia 2 hazavyja pistalety, samazaradnaja palaŭničaja strelba, revalvier i 39 tratyłavych šašak. Mienavita z dapamohaj hetaj zbroi i vybuchovych rečyvaŭ «kurjer» pavinien byŭ zapałochać da śmierci zamožnych hamialčan i prymusić ich raskašelicca. Złačynny «štab» užo skłaŭ spis budučych achviaraŭ i navat padličyŭ «prybytak» ad rekiecirskaj dziejnasci: bandyty mierkavali sabrać daninu ŭ pamiery bolš za 320 tysiač dołaraŭ. Adnak dziakujučy prafiesijanalizmu supracoŭnikaŭ UBEZ Ministerstva ŭnutranych spraŭ hetyja złačynnyja płany nie ažyćciavilisia. Siamiejnuju bandu svoječasova vyjavili i ŭsich rekieciraŭ źmiascili za kraty. A niadaŭna adbyŭsia sud nad usioj złačynnaj čaćviorkaj. Juryja Karniejeva sud Navabielickaha rajona Homiela pryhavaryŭ da 14 hadoŭ pazbaŭleńnia voli, jaho žonka praviadzie za kratami 6 hadoŭ. Baćka Juryja Karniejeva i syn atrymali adpaviedna 3 hady pazbaŭleńnia voli ŭmoŭna i 5 hadoŭ abmiežavańnia voli.
