Karakas maje namier ukłaści 500 miljonaŭ dalaraŭ u stvareńnie venesuelska-biełaruskaha investycyjnaha fondu.
Jak paviedamili karespandentu BIEŁTA u pres-centry Dziaržaŭnaha sakrataryjatu Rady Biaśpieki Biełarusi, u składzie biełaruskaj delehacyi — kiraŭniki šerahu ministerstvaŭ i pradpryjemstvaŭ.
Pieršyja pieramovy dziaržsakratar Rady Biaśpieki Viktar Šejman pravioŭ ź ministram bazavaj i harnarudnaj pramysłovaści Venesueły Chase Kanam, ministram enerhietyki i nafty Rafaelem Ramiresam, ministram infrastruktury Chase Kabela, ministram žytła i žyłoha asiarodździa Ramonam Karsalesam, ministram abarony Ranchielem Bryseńjo.
Venesueła hatovaja nabyvać biełaruskuju pradukcyju, a taksama stvarać na svajoj terytoryi supolnyja pradpryjemstvy pa zdabyčy nafty, vytvorčaści aŭtatraktarnaj, darožnaj, karjernaj i pabytovaj techniki, budaŭničych materyjałaŭ i inšych vytvorčaściaŭ, u tym liku ŭ sfery pasłuh.
Prezydent Venesueły Uha Čaves nosicca z prajektami stvareńnia ŭ krainie «200 sacyjalistyčnych pradpryjemstvaŭ». Jon źbirajecca budavać u krainie sacyjalizm. Taksama jon razhortvaje zakupki zbroi, rychtujučysia da «vajny suprać suśvietnaha imperyjalizmu». Čaves viadzie aktyŭnuju antyamerykanskuju prapahandu, niahledziačy na toje, što ZŠA zastajecca hałoŭnym spažyŭcom venesuelskaj nafty.
Čaves karystajecca ź vializnych dachodaŭ ad prodažy nafty, na jakuju Venesueła bahataja. Jon padtrymlivaje finansava Kubu Fidela Kastra. Uzamien Kuba naładžvaje ŭ Venesuele systemu achovy zdaroŭja.
U Venesuele ŭžo dziejničaje vytvorčaść «balivaryjanskich kamputaraŭ» na zavodzie, zbudavanym kitajcami. Dniami byŭ adkryty zavod pa vypusku iranskich aŭtamabilaŭ «Samand». U hetym šerahu staić i žadańnie Čavesa naładzić vypusk traktaraŭ MTZ, hruzavikoŭ MAZ i inšych tavaraŭ, technalohii dla vytvorčaści jakich maje Biełaruś. Na dumku Čavesa, sacyjalizm mahčymy ŭ vypadku samadastatkovaści venesuelskaj ekanomiki. Padobnyja prahramy industryjalizacyi ŭ svoj čas realizoŭvaŭ Stalin.
Ekanamisty skieptyčnyja ŭ acenkach budučyni hetaj prahramy. Mnohija ličać, što z padzieńniem cenaŭ na naftu Venesueła stracić mahčymaść ažyćciaŭlać jaje.
U svoj čas Saviecki Sajuz zarablaŭ, adpraŭlajučy specyjalistaŭ na budoŭli ŭ krainy Treciaha śvietu. Niešta padobnaje rychtujecca ŭ biełaruska-venesuelskich adnosinach.
