 |
27 červienia ŭpieršyniu za 60 hadoŭ dnieprapiatroŭskija ryma‑kataliki adsłužyli mesu ŭ kaściole Śviatoha Jazepa, a nie na jaho prystupkach.
«Dźviery ŭ kaścioł raptam akazalisia adčynienymi naroschryst, niby zaprašali zajści», — raskazaŭ «24» starasta ryma‑katalickaj abščyny Dnieprapiatroŭsku Valer Hmyrko.
Ale ščaście viernikaŭ było niadoŭhim: 3 lipienia čaćviora nieviadomych maładzionaŭ, jakija nazvalisia pradstaŭnikami achoŭnaj struktury, hvałtam vyhnali pradstaŭnikoŭ ryma‑katalickaj abščny z dnieprapiatroŭskaha kaściołu.
U abłasnoj administarcyi nie spračajucca: kataliki nasamreč mohuć pretendavać na budynak, ale kaścioł naležyć pryvatnaj firmie, tamu ŭłady nia ŭ stanie dapamahčy. Bo tady budzie parušanaje prava ŭłasnaści. «Pavodle najaŭnych dakumentaŭ budynak ličycca za adnoj kampanijaj, — kamentuje sytuacyju zahadčyk sektara pa spravach relihii abłdziaržadministracyi Mikałaj Abraimaŭ. — I na siońniašni dzień prava ŭłasnaści ŭ ich nichto nie adbiraŭ. Tamu vyrašyć, chto maje racyju, a chto nie, možna tolki ŭ sudovym paradku».
Kultavy budynak u centry horadu zaŭždy pryciahvaŭ biznesoŭcaŭ nia mienš jak viernikaŭ. U 1997 hodzie jon byŭ pradadzieny śpiarša ŭkrainska‑panamskaj, zatym panamskaj, a paśla amerykanskaj firmie. Kažuć, za seryjaj uhodaŭ stajaŭ tahačasny «hanarovy staršynia» abłrady Pavał Łazarenka. Prynamsi, pieršym pradaŭcom budynku vystupała abłrada, usie finansavyja aperacyi byli aformlenyja za dva tydni praz davieranych asob u Dnieprapiatroŭsku. A kancavy pakupnik — firma «Dahsbery inkarparejted» zarehistravanaja ŭ štacie Kalifornija, dzie da taho času Pavał Ivanavič užo paśpieŭ zajmieć salidny majontak.
Dnieprapiatroŭskija kataliki bolš za 10 hadoŭ zmahajucca za hety budynak i patrabujuć viarnuć jaho abščynie. Vierniki pisali listy prezydentu, premjeru, abłasnym uładam i navat Papu Rymskamu. A niadaŭna pačali padavać zyski ŭ sud.
U hetuju sieradu vakoł kaściołu Śviatoha Jazepa, na prystupkach jakoha apošni tydzień prychadžanie kruhłasutačna malilisia za viartańnie chramu, byŭ uźviedzieny płot nibyta dziela biaśpieki viernikaŭ.
Farmalny ŭłaśnik budynku patrabavaŭ taksama, kab kataliki spynili svaju malitvu j vyzvalili terytoryju kala chramu. Adnak milicyjanty, jakija prybyli na vyklik nastajaciela parafii, paćvierdzili pravamocnaść znachodžańnia katalikoŭ na hetym miescy.
Miž saboj dnieprapiatroŭskija kataliki žartujuć, što «Dahsbery» varta ŭstalavać prapusknyja punkty i pašpartny kantrol na centralnym praspekcie horadu, kab jašče dalej adsunuć katalikoŭ ad ich śviatyni.
Siońnia prychadžanie praciahvajuć malicca, ciapier užo pierad płotam, za jakim znachodzicca chram.
Fota — Denis Davydov (z fotarepartažu na didaio.livejournal.com)
