6 lipienia
Maładych abaroncaŭ Horadni
U abłasny KDB i milicyju vyklikajuć moładzievych aktyvistaŭ kampanii «Vyratujem Horadniu!» Kolki čałaviek nakiravali ŭ adździeły ŭ spravach niepaŭnaletnich i na administracyjnyja kamisii vykankamaŭ. Aktyvistaŭ štrafujuć i pałochajuć čornymi śpisami: nibyta jany nia zmohuć navučacca i pracavać u krainie, kali nie adrakucca ad udziełu ŭ vuličnych akcyjach. Ściapana Śvidzierskaha na administracyjnaj kamisii rajvykankamu aštrafavali na 40 bazavych vieličyniaŭ za rasklejvańnie nalepak z zaklikam spynić razbureńnie histaryčnaj častki Horadni. Vučanicu haradzienskaj viečarovaj škoły № 2 Nadzieju Krapivinu vyklikali na pasiedžańnie inspekcyi pa spravach niepaŭnaletnich.
8 lipienia
Zatrymali z hazetami
Supracoŭniki aršanskaj milicyi pozna ŭviečary zatrymali siabra niezarehistravanaha «Maładoha frontu» Ihara Kaźmiarčaka. Kala siabie chłopiec mieŭ biuleteń «Volnaje pavietra», vydańni «Aršanski vieśnik» i «Prava na volu». Moładzievaha aktyvista pratrymali kala dźviuch hadzinaŭ u Aršanskim RUUS. Milicyjanty skłali pratakoł ab kanfiskacyi drukavanaj pradukcyi.
9 lipienia
Klimava i Kazulina izalujuć
Pavodle niepaćvierdžanych źviestak, palitźniavoleny Alaksandar Kazulin byŭ źbity supracoŭnikam administracyi kalonii «Vićba‑3». Kiraŭnictva kalonii hetyja źviestki źniapraŭdžvaje. Svajaki palityka turbujucca, što daŭno nie atrymlivali ad jaho listoŭ. Niama źviestak i ad byłoha deputata Andreja Klimava, jakoha trymajuć u mienskim śledčym izalatary ŭžo bolš za try miesiacy. Try tydni tamu Klimaŭ ź mienskaha turemnaha špitala patrapiŭ u medyčny punkt śledčaha izalataru.
Štraf za abaronu Ščukina
Zaviaršyŭsia apošni sud nad zatrymanymi udzielnikami akcyi ŭ abaronu viciebskaha pravaabaroncy Valery Ščukina.
Sudździa Viciebskaha rajonnaha sudu Michaił Zubienia paličyŭ moładzievaha aktyvista Alesia Dzieravianku vinavatym u parušeńni art. 23.34 KaAP RB (parušeńnie paradku arhanizacyi i praviadzieńnie masavych mierapryjemstvaŭ) dy pakaraŭ taho štrafam u pamiery 1 bazavaj vieličyni (31 tys. bieł. rub.).
