Vadziciel, kirujučy aŭtamabilem «Niva‑Šeŭrale», učyniŭ najezd na viełasipiedystku — miascovuju žycharku, jakaja pamierła na miescy. Aŭtamabilem kiravaŭ staršynia Buda‑Kašaloŭskaha rajvykankama Mikałaj Čarnyš.
Jak paviedamiŭ BiełaPAN śledčy prakuratury Homielskaj vobłaści Alaksandr Ščahłoŭ, u vyniku daśledčaj pravierki było ŭstanoŭlena, što ŭ dziejańniach vadziciela adsutničaje skład złačynstva. «Pa vynikach aŭtatechničnaj pravierki było ŭstanoŭlena, što vadziciel Čarnyš nie mieŭ techničnaj mahčymaści praduchilić DTZ», — udakładniŭ śledčy.
Śviedka DTZ Alena Dudarava paviedamiła BiełaPAN, što 22 krasavika jana sa svajoj kalehaj Lidzijaj Tkačovaj jechała pa abočynie darohi na viełasipiedzie z pracy — małočna‑tavarnaj fiermy. «Paśla niejkaha ŭdaru ja apynułasia ŭ kiuviecie. Kali vybrałasia na darohu, to ŭbačyła Lidu, jakaja lažała na darozie ŭ kryvi. Krychu dalej stajała mašyna, ź jakoj vyjšaŭ naš staršynia rajvykankama. Chaču zaŭvažyć, što, kali my jechali, trasa była pustaja, nie jechali nijakija sustrečyja mašyny. Jak jon moh jaje padbić — nie razumieju», — ździviłasia A.Dudarava.
Dačka zahinułaj Volha paviedamiła BiełaPAN, što svajaki niabožčycy nie zhodnyja z rašeńniem prakuratury ab admaŭleńni ŭ raspačynańni kryminalnaj spravy. «Našu maci zabili, i nikomu niama nijakaj spravy. A staršynia rajvykankama jak pracavaŭ, hetak i pracuje. Jamu, napeŭna, navat i štrafu nie dali. My budziem skardzicca na dziejańni milicyi i prakuratury», — skazała Volha.