Śledčy kamitet raspačaŭ novuju kryminalnuju spravu pa budaŭničych spravach KUP «UKB Viciebskaha abłvykankama».

Kryminalnaja sprava zaviedziena pa materyjałach Upraŭleńnia pa baraćbie z ekanamičnymi złačynstvami (UBEP) UUS viciebskaha abłvykankama. Dyrektaru pryvatnaha budaŭničaha pradpryjemstva TAA «Sanata-Bud» inkryminujecca ździajśnieńnie złačynstva pa č.6 art.16, č.3 art.426 Kryminalnaha kodeksa Biełarusi (pasobnictva ŭ pieravyšeńni ŭłady abo słužbovych paŭnamoctvaŭ). Dadzieny artykuł praduhledžvaje pakarańnie da 10 hadoŭ pazbaŭleńnia voli z kanfiskacyjaj majomaści.

Pavodle dadzienych śledstva, padazravany ŭ 2008 hodzie akazaŭ dapamohu adnoj sa słužbovych asob KUP «USK Viciebskaha abłvykankama» ŭ ździajśnieńni supraćpraŭnych dziejańniaŭ, u vyniku čaho pradpryjemstvu byŭ naniesieny ŭron u pamiery bolš za 460 miljonaŭ rubloŭ.

Cikava, što ŭ sakaviku 2012 hoda prakuraturaj Minskaha ŭ dačynieńni da dyrektara TAA «Sanata-bud» užo była zaviedziena kryminalnaja sprava.
Jamu inkryminavałasia ździajśnieńnie złačynstva pa č.4 art.210 Kryminalnaha kodeksa Biełarusi (kradziež šlacham złoŭžyvańnia słužbovymi paŭnamoctvami). Pavodle dadzienych prakuratury, padazravany ŭ listapadzie-śniežni 2010 hoda, złoŭžyvajučy słužbovymi paŭnamoctvami, ździejśniŭ kradziež 235 młn rubloŭ.

Nahadajem taksama, što hod tamu Śledčy kamitet pa materyjałach usio taho ž UBEP UUS Viciebskaha abłvykankama zavioŭ kryminalnuju spravu ŭ dačynieńni da byłoha dyrektara KUP «Upraŭleńnie kapitalnaha budaŭnictva Viciebskaha abłvykankama».

Pavodle źviestak UUS Viciebskaha abłvykankama, padazravany daŭ ukazańnie ab składańni i padpisańni fiktyŭnych aktaŭ vykananych rabot, u jakich byli zavyšanyja abjomy košcie pry padrychtoŭcy da letniaha siezonu adnaho ź dziciačych łahieraŭ vobłaści. Pry hetym hrošy na ramont łahiera nakiroŭvalisia pa prezidenckaj prahramie «Dzieci Biełarusi».

Pavodle padlikaŭ apieratyŭnych słužbaŭ, škoda dziaržaŭnamu biudžetu ad dadzienych dziejańniaŭ skłała bolš za 1 miljard rubloŭ.

Dziejańni byłoha dyrektara byli kvalifikavanyja pa č.3 art.424 Kryminalnaha kodeksa Biełarusi (złoŭžyvańnie ŭładaj abo słužbovymi paŭnamoctvami).

Źviazany ŭsie hetyja spravy pamiž saboj pakul nie tłumačycca. Ale vidavočna, što jany stali vynikam ŭzajemadziejańnia pamiž saboj šmatlikich pravaachoŭnych orhanaŭ Biełarusi.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?