«Łabaratoryja Kaśpierskaha» apublikavała spravazdaču ab daśledavańni apieracyi «Čyrvony kastryčnik», jakaja pravodzicca chakierami z metaj špijanažu za roznymi krainami śvietu.Jana pačałasia jašče ŭ 2007 hodzie i praciahvajecca da hetaha času.
Čyrvonym paznačanyja krainy, na jakija ažyćciaŭlałasia ataka.
Nieviadomyja kibierzłačyncy sačyli za dypłamatyčnymi, ŭradavymi i navukovymi arhanizacyjami ŭ bolš čym 50 krainach śvietu, u tym liku i Biełarusi.
U našaj krainie byli zafiksavanyja piać zaražeńniaŭ — uvahu chakieraŭ pryciahnuli dziaržaŭnyja ŭstanovy, ambasady, daśledčyja instytuty i naftahazavyja kampanii.U antyvirusnaj bazie «Łabaratoryi Kaśpierskaha» dadzienaja škodnasnaja prahrama maje nazvu Backdoor. Win32.Sputnik.
«Dziejańni złamyśnikaŭ byli nakiravany na atrymańnie kanfidencyjnaj infarmacyi, dadzienych, jakija adkryvajuć dostup da kamputarnych sistem, piersanalnych mabilnych pryładaŭ i karparatyŭnych sietak, a taksama zbor źviestak hieapalityčnaha charaktaru», — havorycca ŭ spravazdačy.
Dla kantrolu sietki kibierzłačyncy vykarystali bolš za 60 damiennych imionaŭ i sierviery, raźmieščanyja ŭ roznych krainach śvietu. Pry hetym značnaja ich častka znachodziłasia na terytoryi Hiermanii i Rasii.
Dla zaražeńnia sistem złačyncy rassyłali fišynhavyja listy, adrasavanyja kankretnym atrymalnikam u toj ci inšaj arhanizacyi. U skład listoŭ uvachodziła śpiecyjalnaja trajanskaja prahrama, dla ŭstanoŭki jakoj listy ŭtrymoŭvali ekspłojty, jakija vykarystoŭvali ŭraźlivaści ŭ Microsoft Office.
Hetyja ekspłojty ŭpieršyniu byli prydumanyja kitajskimi chakierami, a ŭ skrypcie byli zaŭvažanyja ślady prahramistaŭ z rasijskamoŭnaj prastory — u pryvatnaści, słenhavaje słova «proha».
