Na hetym tydni ŭ Sajuzie architektaraŭ Biełarusi adbyłosia hramadskaje abmierkavańnie prajekta rekanstrukcyi Histaryčnaha centra Minska. Abmierkavańnie atrymałasia niečakana tłumnym i było pieraniesiena na 26 studzienia.

Miž tym, padzieja moža stać losavyznačalnaj dla našaj stalicy. Mienavita na takich abmierkavańniach, aproč abmienu paprokami, adbyvajecca i abmien idejami.

Siarod inšych idej — prapanova Tavarystva achovy pomnikaŭ historyi i kultury zareziervavać i paznačyć vizualna miescy, dzie byli koliś kultavyja budynki, źniščanyja ŭ rozny čas, ale padmurki jakich jašče źbierahajucca ŭ nietrach minskaj ziamli.
Śpiecyjalistami byŭ zrobleny analiz, raspracavany historyka-architekturny aporny płan na sučasnaj hieałahičnaj padasnovie, što dazvoliła kančatkova vyznačyć dakładnaje miesca raźmiaščeńnia vielmi cikavych abjektaŭ u centry Minska — padmurki kaściołaŭ, cerkvaŭ i sinahoh. Hetyja eskiznyja prapanovy byli pieradadzieny Tavarystvam achovy pomnikaŭ u vykanaŭčyja orhany, jak čarhovaja prapanova da Prajekta detalnaha płana histaryčnaha centra Minska. Prapanoŭvajecca paznačyć padmurki kolišnich śviatyniaŭ na terytoryi horada srodkami dobraŭparadkavańnia miescaŭ raźmiaščeńnia niekalkich kultavych budynkaŭ.
Siarod inšych i padmurak banifrackaha kaścioła Sv. Jana Chryściciela.

Hety chram znachodziŭsia u XVIII -XIX stst. na Ciomnych Kramach niepadalok ad Mienskaha Zamčyšča na rahu vulicaŭ Zybickaj (Handlovaj) i Kaźmadziamjanaŭskaj, paznačajučy miažu Nizkaha rynku i Vierchniaha Horada.

Siońnia rešty hetaha chrama i klaštara apynulisia pad prajeznaj častkaju pierad mostam praź Śvisłač u bok Trajeckaha pradmieścia, prosta nasuprać prypynka hramadskaha transparta.
    Klaštar banifrataŭ byŭ zasnavany minskim stolnikam i padstarostam Antonijem Teadoram Vańkovičam, jaki ŭ 1700 h. achviaravaŭ banifratram 10 tysiač złotych i vialiki plac na Starym Rynku. U XVIII st. miecenatami klaštara byli Maryjana Šyškava, Michaił Dermonta-Švicki, Stanisłaŭ Jelski, Skvarkoŭskija, Antonij Pšaździecki, Iosif Statkievič, Piotr Mickievič i inšyja. U 1763 h. dziakujučy minskamu starostu Michału Vaładkoviču było zakončana budaŭnictva ŭ styli baroka muravanaha kaścioła, što fasadam vychodziŭ na Rakaŭskuju. Jon byŭ bahata azdobleny, mieŭ šeść raznych draŭlanych i muravanych ałtaroŭ i nievialikuju kryptu, dzie pierachovalisia pachavańni śviataroŭ i fundataraŭ. U kaściole źbierahaŭsia i słynny cudadziejny abraz Maci Božaj, azdobleny karonami i srebranymi šatami.

Klaštar banifrataŭ, aproč taho, składaŭsia z klaštarnych karpusoŭ, špitala, u jakim lačylisia ŭbohija i viaźni, haspadarčych pabudovaŭ i sada. Braty-banifraty zabiaśpiečvali pacyjentaŭ lekami i praduktami. Tut isnavała i biblijateka. U 1831 rasiejskija ŭłady kanfiskavali kaścioł i klaštar u manachaŭ i pradali ich z publičnaha torhu. Paśla 1864 h. kaścioł zrujnavali, a klaštarnyja zbudavańni prystasavali pad žyllo.

Abjom kaścioła Śviatoha Jana mieŭ važnaje, unikalnaje značeńnie dla centra horada, bo na im sychodzilisia pierśpiektyvy adrazu čatyroch vulicaŭ, jon byŭ bačny i z-za raki z Zamčyšča.

Kab siońnia hety chram byŭ na svaim miescy, to jaho možna było by bačyć praz usie nabiarežnyja, ad vulicy Kupały, ad Pałaca sporta i až ad hetelu «Biełaruś». Na im by sychodzilisia vizualnyja pierśpiektyvy vulicaŭ Bahdanoviča, Handlovaj, Niamihi i praśpiekta Pieramožcaŭ!
Hetaje absalutna ŭnikalnaje pałažeńnie abjekta robiać pierśpiektyvu jahonaha ŭznaŭleńnia prosta nieabchodnaj, z horadabudaŭničaha hledžańnia.

Na žal, amal uvieś kompleks znachodzicca pad asfaltam darohi, što ŭskładniaje zadaču navat praviadzieńnia tam archieałahičnych raskopak, što mahli b prynieści nam, naščadkam, roznyja siensacyi. Na hetym etapie Tavarystva achovy pomnikaŭ prapanuje vizualna paznačyć płan padmurkaŭ, akreślić terytoryju kolišniaha raźmiaščeńnia śviatyni.

Nastupnym krokam, kali heta budzie zakładziena ŭ pierśpiektyŭny Płan histaryčnaha centra Minska, mahło b stać častkovaje ŭznaŭleńnie abjomaŭ hetaha ŭnikalnaha abjekta ŭ pracesie rekanstrukcyi i dobraŭparadkavańnia Zamčyšča.
I heta ŭžo nie vyhladaje siońnia fantastykaj. Naprykład, Minharvykankam užo byŭ padtrymaŭ prapanovu Biełaruskaha tavarystva achovy pomnikaŭ historyi i kultury adnavić na Kastryčnickaj płoščy stalicy kaścioł Śviatoha Tamaša Akvinskaha — pomnik baroka XVII–XVIII st.
Viedama, uznavić stračany pomnik niemahčyma, pa vyznačeńni, jak nie mahčyma ŭznavić, naprykład, trochsothadovy dub.
Ale naviečna zastajecca namolennaść miesca. I viedučy razmovu pra nieabchodnaść paznačyć jaho, my nie tolki addajem daninu pamiaci našym prodkam, ale i ŭzbahačajem duchoŭna samich siabie.
Što da abjoma kolišniaha abjekta, to zvažajučy na jahonuju vyklučnuju horadabudaŭničuju važnaść, pry dapamozie čaho možna budzie zamknuć pierśpiektyvu vulicaŭ, sensava akreślić miežy histaryčnych terytoryj, pavysić kulturny, aśvietny i estetyčny patencyjał samaha centra staražytnaha horada, to i jaho ŭźviadzieńnie ŭžo całkam realnaje.
U śviatle praktyki, što skłałasia ŭ našaj krainie, paśla «adbudovy» Niamihi ŭ vyhladzie parkinha, pabudovy novaha hatelu «Jeŭropa» za tuzin metraŭ ad taho miesca, dzie histaryčna stajaŭ kolišni hatel z toj ža nazvaju, abo pieranosu na inšaje miesca rešty budynka minskaje elektrastancyi, usio stanovicca realnym u śviatle vierajemnych interpretacyŭ našaje spadčyny, našaje histaryčnaje identyčnaści. I ŭ dadzienym kantekście ŭžo nie istotna ci budzie toj abjekt, što hipatetyčna budzie adpaviadać abjomu, stylistycy i miescu kolišniaha kaścioła banifrataŭ, nanoŭ chramam ci vystavačna-kancertnaj załaj, što budzie nieści ŭ sabie pamiać pra były chram…
Istotna, kab nie zhubiłasia sama pamiać, jakuju my pavinny pieraniać i pieradać naščadkam.

Z usimi inšymi prapanovami Biełaruskaha dobraachvotnaha tavarystva achovy pomnikaŭ historyi i kultury, pa roznych abjektach, takich jak kolišniaja Uźniasienskaja carkva na vulicy Vyzvaleńnia, abo kaścioła Michała Archanioła klaštara bieniedyktynaŭ, na vulicy Revalucyjnaj, možna paznajomicca i vykazać svajo mierkavańnie 26 studzienia ŭ Sajuzie architektaraŭ.

Mienavita tam budzie praciah hramadskaha abmierkavańnia skarektavanaha prajektu rekanstrukcyi Histaryčnaha centra Minska.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?