Pra heta paviedamiŭ pradstaŭnik kamiteta Rasijskaj akademii navuk pa mietearytach Viktar Hrachoŭski z Uralskaha fiederalnaha ŭniviersiteta. Sa słovaŭ Hrachoŭskaha, nieziamnaja pryroda vyjaŭlenych frahmientaŭ parody paćvierdžana chimičnymi daśledavańniami, jakija pravodzilisia ŭ łabaratoryi ŭniviersiteckaha navukova-adukacyjnaha centra «Nanatech».

Mietearyt adnosicca da kłasa samych zvyčajnych — chandrytaŭ.
Jon ujaŭlaje saboj kamienny mietearyt z utrymańniem žaleza kala 10%. «Heta kamienny mietearyt, zvyčajny chandryt, my dyjahnastavali ŭsie typovyja minierały, jakija tam jość — i mietaličnaje žaleza, i alivin, i sulfit. Jaho dastavili pozna, 53 čaścinki jany pryvieźli, jany nievialikija, ale ŭsie jany majuć mietearytnuju pryrodu, i kara płaŭleńnia jość», — paviedamiŭ Hrachoŭski.
U mižnarodnym katałohu novy mietearyt, chutčej za ŭsio, atrymaje nazvu «mietearyt Čebarkul».

Frahmienty mietearyta znajšli 15 lutaha vakoł pałonki na voziery Čebarkul. Dyjamietr abłomkaŭ składaje ad 0,5 da adnaho santymietra. Usie ich sabrali na lodzie. Najbolšy ž frahmient moža znachodzicca na dnie proci pałonki.

Raniej, 16 lutaha, ułady Čelabinskaj vobłaści paviedamlali ab tym, što pošuki abłomkaŭ mietearyta zavieršany, bo ŭ miescy jaho mierkavanaha padzieńnia ničoha nie znojdziena. Mahčyma, takim čynam jany chacieli źbić z tołku patencyjnych čornych šukalnikaŭ.

Nahadajem, mietearyt vybuchnuŭ nad Čelabinskaj vobłaściu ranicaj 15 lutaha.

Mahutnaść vybuchu, jaki adbyŭsia paśla ŭvachodu mietearyta ŭ atmaśfieru, skłała, pavodle acenak NASA, ad 300 da 500 kiłaton.
Pavodle tych samych acenak, dyjamietr mietearyta składaŭ kala 17 mietraŭ, a masa — prykładna 10 tysiač ton. Mietearyt uvajšoŭ u ziamnuju atmaśfieru na chutkaści nie mienš za 64 000 kiłamietraŭ za hadzinu i vybuchnuŭ na vyšyni ad 19 da 24 kiłamietraŭ.
Heta najbujniejšaje takoje zdareńnie ad časoŭ Tunhuskaha mietearyta. Takija źjavy zdarajucca raz na sotniu hadoŭ.
Клас
0
Панылы сорам
0
Ха-ха
0
Ого
0
Сумна
0
Абуральна
0