Try studenty napisali zajavu ŭ inspekcyju pa padatkach i zborach ab tym, što ŭ pryvatnym domie, dzie prachodziŭ kupalski kancert niezaležnych bardaŭ, stajała skrynia dla zboru hrošaj.

Novyja technalohii cisku na apazycyju tradycyjna apracoŭvajucca na Homieli. Na hety raz tam sprabujuć pakarać arhanizataraŭ niezaležnaha bardaŭskaha kancertu. Dla hetych metaŭ vykarystali troch studentaŭ.

Arhanizataraŭ kancertu z udziełam biełaruskich bardaŭ, jaki prajšoŭ u Homieli na Kupalle, padatkovaja inspekcyja abvinavačvaje ŭ niezakonnaj pradprymalnickaj dziejnaści.

30 lipienia sprava razhladałasia ŭ haspadarčym sudzie Homielskaj vobłaści. Jak śćviardžaje adna z arhanizataraŭ kancertu Łarysa Šyrakova i jašče siem čałaviek, jakija prysutničali na kancercie, vystupleńnie bardaŭ ‑‑ Źmitra Bartosika, Valžyny Ciareščanki i Andreja Mielnikava ‑‑ prachodziła na hramadzkich pačatkach, hrošaj za kancert nichto nie braŭ. U svaju čarhu pradstaŭnik abłasnoj inspekcyi Ministerstva pa padatkach i zborach Andrej Leŭšunoŭ u jakaści dokazu ažyćciaŭleńnia pradprymalnickaj dziejnaści pryvioŭ śviedčańni troch studentaŭ Homielskaha ŭniversytetu Antona Janačkina, Piatra Vialeva i Stanisłava Łapyki. Hetyja maładyja ludzi napisali zajavu ŭ inspekcyju pa padatkach i zborach ab tym, što ŭ pryvatnym domie, dzie prachodziŭ kancert, stajała skrynia, kudy tre było kłaści hrošy.

Kali sud pryznaje fakt parušeńnia, arhanizataram kancertu pahražaje štraf.

U časie razhladu sudździa Viktoryja Łaputa zaznačyła, što «skrynia ‑‑ heta nie Łarysa Šyrakova, tamu niama padstaŭ havaryć ab tym, što mienavita jana brała hrošy za vystupleńnie artystaŭ». Tym bolš što ŭ artykule ab niezakonnaj pradprymalnickaj dziejnaści Kodeksu ab administracyjnych parušeńniach idzie havorka ab systematyčnym atrymańni dachodu. U vypadku ž z arhanizatarami kancertu takija fakty nie paćviardžajucca.

Dla pryniaćcia rašeńnia sud uziaŭ pierapynak da 31 lipienia.

Naziralniki zaŭvažajuć, što homielskija specsłužbisty majuć reputacyju niepieraborlivych u srodkach. U Homieli najčaściej vybuchali skandały, źviazanyja z verboŭkaj ludziej psychična niaŭstojlivych, a jašče studentaŭ šlacham šantažu.

Mienavita homielski supracoŭnik KDB zaverbavaŭ Uładzia Michajłava. Tamsama ŭ svoj čas sprobami verboŭki byŭ daviedzieny da samahubstva «zubroviec» Zajcaŭ. U Homieli ž — adziny vypadak na ŭsiu krainu — prakuratura dała papiaredžańnie žurnalistcy za pracu na zamiežnuju radyjostancyju. A moładzievych aktyvistaŭ aktyŭna ciahali na dopyty, vinavaciačy ŭ naležnaści da niezarehistravanych arhanizycyj. Darečy, pracent hałasoŭ «za» ŭ Homielskaj vobłaści niaźmienna akazvajecca najvyšejšy pa krainie.

U vypadku z arhanizatarami kancertu asablivuju ahidu vyklikaje toj fakt, što ataka skiravanaja rychtyk suprać biełaruskaje kultury i tych ludziej, jakija sprabujuć jaje zachavać. Nie abyšłosia ŭ hetaj spravie i biez «upraŭleńnia idealohii». Toj kupalski kancert byŭ zładžany ŭ pryvatnym domie. Dom kultury razarvaŭ raniej zaklučanuju damoŭlenaść na jaho praviadzieńnie.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?