Siońnia prajšli sudy nad zatrymanymi ŭ piatnicu 27 lipienia moładzievymi aktyvistami.
Sud Zavodzkaha rajonu stalicy prysudziŭ syna staršyni Partyi BNF Franka Viačorku da 7 sutak administracyjnaha aryštu. Jaho zatrymali na vulicy Miaśnikova, u chłopca znajšli ŭlotki z zaklikam uziać udzieł u śviatkavańni 17‑j hadaviny pryniaćcia Deklaracyi ab dziaržaŭnym suverenitecie.
15 sutak dali maładafrontaŭcu Jarasłavu Hryščeniu. Jaho taksama zatrymali ŭdzień 27 lipienia na padychodzie da Płoščy Niezaležnaści i znajšli pry vobšuku ŭlotki. Praŭda, sud Leninskaha rajonu Miensku «nie źviarnuŭ na heta ŭvahu» na takuju drabiazu. Hryščenia atrymaŭ sutki za «niecenzurnuju łajanku».
