Na 89-ym hodzie pajšoŭ z žyćcia były staršynia lehiendarnaha kałhasu «Śvitanak» Vasil Staravojtaŭ.

«Heta strata dla ŭsioj Biełarusi, — kaža lidar Abjadnanaj hramadzianskaj partyi Anatol Labiedźka (mienavita ŭ AHP uvachodziŭ Staravojtaŭ). — Kraina straciła Asobu, Lehiendu, refarmatara. Vasil Kanstancinavič nie tolki dvojčy Hieroj pracy, heta Hieroj našaha času. Čałaviek, što nie zachacieŭ padładžvacca pad kiraŭnika, što nie zachacieŭ być siarod prydvornaj čeladzi. U jaho zaŭsiody byŭ svoj ​​pohlad na navakolny śviet, svaja pazicyja.

My šukajem hierojaŭ u minułym, za miežami krainy. A jany pobač z nami».

Vasil Staravojtaŭ naradziŭsia 13 červienia 1924 ŭ vioscy Barok Białynickaha rajona Mahiloŭskaj vobłacci.

Udzielničaŭ u vajnie ŭ jakaści bajca, paźniej — pamočnika načalnika štaba 600-ha partyzanskaha atrada. Pracavaŭ na kamsamolskaj i partyjnaj pracy.

U 1957–1968 pracavaŭ dyrektaram saŭhasa «Radnianski» Klimavickaha rajona.

U 1968–1997 — staršynia kałhasa «Śvitanak» imia K. Arłoŭskaha. Paśla razvału savieckaj sistemy pieravioŭ pracy svajoj ahrahaspadarki na rynkavyja asnovy, zachavaŭ jaje prybytkovaj.
Abiraŭsia delehatam XXV, XXVI i XXVII źjezdaŭ KPSS, deputatam Viarchoŭnaha Savieta SSSR 8-ha i 10-ha sklikańniaŭ, deputatam Viarchoŭnaha Savieta BSSR.
U 1994 vystupiŭ z krytykaj Alaksandra Łukašenki, nie padtrymaŭ jaho kandydaturu na vybarach. Viedaŭ jaho jašče pa saŭhasie «Haradziec» i nizka aceńvaŭ jaho jak menedžara. U kastryčniku 1997 hoda byŭ adchileny ad pracy i aryštavany.
Abvinavačvaŭsia ŭ pieravyšeńni słužbovych paŭnamoctvaŭ, ekanamičnych złačynstvach, chabary, arhanizacyi zabojstva kiraŭnika mahiloŭskaha Dziaržkantrolu Mikałuckaha. Pravioŭ za kratami amal paŭtara hoda.
U SIZA jon pieranios dva sardečnyja prystupy, mikrainsult, paśla jakoha nie moh havaryć, praktyčna straciŭ zrok.

Paśla vyzvaleńnia ź miescaŭ źniavoleńnia viarnuŭsia dadomu, u viosku Myškavičy Mahiloŭskaj vobłaści.

Dvojčy Hieroj Sacyjalistyčnaj Pracy, kavaler troch ordenaŭ Lenina, ordenaŭ Kastryčnickaj Revalucyi, Ajčynnaj vajny 1-j stupieni, Čyrvonaj Zorki — usio heta najvyjšejšyja ŭznaharody savieckaha času.

Ad 1990-ch da śmierci padtrymlivaŭ Demakratyčnuju apazicyju Biełarusi, uvachodziŭ u kiraŭničyja struktury Abjadnanaj hramadzianskaj partyi.

Клас
0
Панылы сорам
0
Ха-ха
0
Ого
0
Сумна
0
Абуральна
0