Aŭstryjskaja firma «ATIES Holding Gmbh» u 2007‑2011 hadach nabudzie akcyi AAT «Motavieła» na 15,6 młrd. rubloŭ. Adpaviednaje rašeńnie ŭtrymlivajecca va ŭkazie prezidenta № 354 ad 26 lipienia 2007 hoda, apublikavanym na Nacyjanalnym pravavym interniet‑partale.
Jak paviedamili ŭ naziralnym saviecie akcyjaniernaha tavarystva, va ŭłasnaść aŭstryjskaj firmy piarojduć usie akcyi, što naležać dziaržavie, — 99,7%; 0,3% akcyj naležyć fizičnym asobam. Apłata akcyj budzie ažyćciaŭlacca z 1 studzienia 2008 hoda roŭnymi dolami štohod pa 3,1 młrd. rubloŭ.
Zhodna z ukazam, firma taksama apłacić daŭhi pradpryjemstva pierad biudžetam krainy i Minska i inviestuje ŭ jaho ŭ 2008‑2012 hadach nie mienš čym 20 młn. dołaraŭ. Pry hetym firma «ATEC» abaviazana budzie zachavać śpiecyjalizacyju AAT «Motavieła» i jaho handlovuju marku.
U vypadku nievykanańnia ŭziatych na siabie abaviazacielstvaŭ firma «ATIES» budzie abaviazana pieraličyć u respublikanski biudžet sumy, jakija składajuć roznaść pamiž rynačnym koštam akcyj na momant nabyćcia i ich naminalnym koštam.
Minski motaviełazavod byŭ pieraŭtvorany ŭ adkrytaje akcyjaniernaje tavarystva ŭ 1999 hodzie. 100 pracentaŭ jaho akcyj naležała pracoŭnamu kalektyvu. AAT «Motavieła» vypuskaje roznyja madeli viełasipiedaŭ, u tym liku dziciačych, a taksama matacykły, hruzavyja motakalaski, viełapryčepy, viełatrenažory, invalidnyja kalaski, zapasnyja častki da matacykłaŭ i viełasipiedaŭ. Na momant akcyjavańnia asnoŭnaja pradukcyja pradpryjemstva paśpiachova realizoŭvałasia na rynkach Rasii i šerahu krain Azii. Ale ŭ apošnija hady «Motavieła» faktyčna było vycisnuta z azijackich rynkaŭ kitajskimi kankurentami. U 2006 hodzie zhodna z rašeńniem prezidenta była praviedziena restrukturyzacyja zapazyčanaści pradpryjemstva pierad respublikanskim i miascovym biudžetami i vydzieleny subsidyi Minharvykankama na 17,3 młrd. rubloŭ dla madernizacyi. Umovaj restrukturyzacyi było adnaŭleńnie dziaržułasnaści, jakaja ciapier składaje 99,7%.
Firmie «ATIES» naležyć biełaruska‑aŭstryjskaje sumiesnaje ZAT «Škłozavod «Jalizava» — najbujniejšaje ŭ Biełarusi pradpryjemstva šklanoj haliny, jakoje dynamična raźvivajecca. U krasaviku 2007 hoda «ATIES» zajaviła pra svoj namier inviestavać srodki ŭ budaŭnictva zavoda pa vytvorčaści kalcynavanaj sody pad Mazyrom (Homielskaja vobłaść).
