Za pieršuju pałovu hodu jon dasiahnuŭ $1793,4 młn. Adnak samaje tryvožnaje dla ekanamičnaje niezaležnaści Biełarusi nia heta.
Deficyt zamiežnaha handlu tavarami za pieršuju pałovu hodu jon dasiahnuŭ $1793,4 młn. Hetyja źviestki raspaŭsiudziła siońnia Ministerstva statystyki i analizu. Pryčym červieńskija vyniki zamiežnaha handlu najhoršyja: minus vyras na $342,7 młn. Rost deficytu ŭ paraŭnańni ź minułym hodam skłaŭ 93 %.
Adnak samaje tryvožnaje dla ekanamičnaje niezaležnaści Biełarusi nia heta. Znoŭ papaŭzła ŭharu zaležnaść Biełarusi ad adnaje krainy. Pryčym heta taja samaja kraina, jakaja nie chavaje svajoj achvoty dałučyć Biełaruś i pieravaryć biełarusaŭ jak nacyju.
Dola Rasiei ŭ zamiežnym handli Biełarusi vyrasła da 48,3 %. (U eksparcie 36,7 %, imparcie — 58,1 %.) Heta niedapuščalnyja ličby dla luboj krainy, što dbaje pra ŭłasnuju biaśpieku.
Kali na adnu krainu prypadaje takaja vysokaja dola zamiežnaha handlu, jana robicca praktyčna biezabaronnaja suprać ekanamičnaha šantažu i heta niepaźbiežna pryvodzić da poŭnaj palityčnaj zaležnaści.
Dla paraŭnańnia: dola Rasiei ŭ zamiežnym handli Łatvii ŭ 2006 hodzie była roŭnaja 8,3 %. I jana suvymiernaja z dolami Litvy, Estonii, Hiermanii i Biełarusi ŭ handli našaj paŭnočnaj susiedki.
Dola Rasiei ŭ zamiežnym handli Estonii, samaj paśpiachovaj u ekanamičnym sensie z byłych savieckich respublik, składała 78 % na vychadzie z SSSR i skaraciłasia da 11 % ciapier.
Što datyčyć našaje paŭdniovaje susiedki, Ukrainy, dyk dola Rasiei ŭ jaje zamiežnym handli tavarami apošnija hady stabilizavałasia na ŭzroŭni 26—29 % (27,5 % za pieršyja piać miesiacaŭ sioleta).
Darečy, zamiežnahandlovy deficyt ukrainskaha zamiežnaha handlu sioleta taksama vyras. Jon skłaŭ za paŭhodu kala $4,6 młrd, što na 35 % bolš čym za analahičny peryjad hodu minułaha.
Sam fakt rostu zamiežnahandlovaha deficytu nia stavić pramoj pahrozy ekanamičnaj stabilnaści. Varta adznačyć, što ŭ Biełarusi admoŭnaje salda roŭnaje 14,3 % ad impartu, tady jak va Ŭkrainie – 16,6 %. Pry tym va Ŭkrainie ŭzrovień vałavoha ŭnutranaha praduktu na dušu nasielnictva nižejšy za biełaruski na 60 %.
Našmat bolšuju niebiaśpieku maje toje, što siońniašni ekanamičny kurs niazdolny vyvieści krainu da sapraŭdnaje šmatvektarnaści.
U 1994 hodzie na dolu Rasiei prypadała 46 % zamiežnaha handlu Biełarusi, na krainy SND — 12 % i jašče 42 % — na astatni śviet. U 1998 hodzie na Rasieju prychodziłasia ŭžo 67 % zamiežnahandlovaha abarotu. Dyversyfikacyju handlu ŭdałosia nanoŭ ažyćciavić uradam Jarmošyna, Navickaha, Sidorskaha za 2000‑2006 hady. Adnak tolki da peŭnaj miery: kraina zastavałasia całkam zaležnaju ad impartu rasiejskich enerhanośbitaŭ. I voś iznoŭ pačałasia advarotnaja tendencyja.
Jaje možna źviazać pieradusim z padzieńniem naftavaha ekspartu Biełarusi paśla źnižeńnia padatkovych ilhotaŭ na ekspart rasiejskaj nafty. Raniej jaje paprostu reekspartavali praź Biełaruś adkryta abo sukryta — paśla pierapracoŭki na «Naftanie» i Mazyrskim naftapierapracoŭčym. Mienavita z naftavymi pieraturbacyjami źviazanaje radykalnaje padzieńnie ekspartu ŭ Niamieččynu sioleta — na 44 % za pieršaje paŭhodździe.
Hetyja ličby adbivajuć taksama nieprystasavanaść biełaruskich vytvorcaŭ da kankurencyi na suśvietnych rynkach. A što zdarycca, kali Rasieja admienić pratekcyjaniscki režym dla niejkich katehoryj biełaruskich tavaraŭ? Perspektyva całkam realnaja ŭ śviatle dałučeńnia RF da Suśvietnaj handlovaj arhanizacyi.
U biełaruskim vypadku heta tym bolš adčuvalna, što naš unutrany rynak mały, a haspadarka ekspartna‑ i impartnaaryjentavanaja.
* * *
Tolki ličby Minstatu
U Biełarusi ŭ studzieni‑červieni 2007 hodu salda zamiežnaha handlu tavarami skłałasia adjemnym u pamiery $1793,4 młn. Za červień 2007 hodu jano vyrasła na $342,7 młn. U studzieni‑červieni 2006 hodu adjemnaje salda składała $927,9 młn.
Abjom zamiežnaha handlu ŭ studzieni‑červieni 2007 hodu skłaŭ $23222,8 młn. Impart tavaraŭ vyras na 22,4 % i skłaŭ $12508,1 młn, ekspart pabolšaŭ na 15,3 % i skłaŭ $10714,7 młn.
Pry hetym ekspart u Rasieju vyras na 28,7 % i skłaŭ $3935,0 młn, va Ŭkrainu na 15,5 % da $575,8 młn. Ekspart pa‑za SND pavialičyŭsia tolki na 5,3 % i skłaŭ $5777,4 młn. Ekspart u Hiermaniju źniziŭsia na 43,8 % i skłaŭ $229,7 młn.
Abjom impartu z Rasiei vyras na 16,1 % i skłaŭ $7271,7 młn. Impart z Ukrainy uzros na 35 % i dasiahnuŭ $695,9 młn. Z krainaŭ pa‑za SND Biełaruś naraściła impart na 31,2 % da $4406,9 młn. Impart z Hiermanii ŭzros u 1,5 razu i skłaŭ $1019,1 młn.
Planam na 2007 hod vyznačałasia zadača davieści salda zamiežnaha handlu da plus $500 młn.
