1 žniŭnia ŭ Biełarusi na 23,3 dołara pavialičvajecca ekspartnaja pošlina na naftu — jana składzie 223,9 dołara za tonu. Adpaviednaje rašeńnie ŭtrymlivajecca ŭ pastanovie Savieta ministraŭ № 952, apublikavanaj na Nacyjanalnym pravavym interniet‑partale. Dakumient unosić źmianieńni ŭ pastanovu ŭrada № 366 ad 24 sakavika 2007 hoda i pryniaty ŭ adpaviednaści z ukazam prezidenta № 60 «Ab staŭkach vyvaznych mytnych pošlin».
Da ŭzroŭniu rasijskich pavialičvajucca taksama 1 žniŭnia ekspartnyja pošliny na naftapradukty. Pošlina na lohkija i siarednija dystylaty, hazojli, prapan, butany, etylen, prapilen, butylen i butadyjen, inšyja zvadkavanyja hazy, bienzoł, tałuoł, ksiłoły pavialičvajecca sa 147,5 da 163,2 dołara za tonu. Na vadkaje paliva, masła, adpracavanyja naftapradukty, naftavy vazielin, minieralnyja voski i anałahičnyja pradukty, koks naftavy, bitum naftavy i inšyja reštki ad pierapracoŭki nafty abo naftapraduktaŭ, atrymanych ź bituminoznych parod, pošlina ŭzraście z 79,4 da 87,9 dołara.
Hetaje rašeńnie pryniata ŭ suviazi z tym, što 1 žniŭnia takija pamiery pošlin ustanoŭleny ŭ Rasijskaj Fiederacyi. U adpaviednaści ź mižuradavym biełaruska‑rasijskim pahadnieńniem staŭki ekspartnych pošlin na naftu i naftapradukty ŭ Biełarusi ŭstanaŭlivajucca ŭ pamiery, roŭnym staŭkam, što prymianiajucca ŭ Rasii. Uvodzicca ŭ dziejańnie jany pavinny ŭ tyja ž terminy, što i staŭki, jakija ŭstanaŭlivajucca adpaviednymi narmatyŭnymi pravavymi aktami Rasijskaj Fiederacyi.
Zhodna ź biełaruska‑rasijskimi damoŭlenaściami, pošlina na naftu, što pastaŭlajecca ŭ Biełaruś z Rasii, raźličvajecca z prymianieńniem kaeficyjenta 0,293.
