Siońnia ranicaj pamior piśmieńnik Jury Jurkaviec. Jamu było 45 hadoŭ.
«Kali skazać, što heta była niečakanaja śmierć, h.zn. ničoha nie skazać, — zaznačaje jahony siabra Źmicier Saŭka. — Heta byŭ čałaviek mocnaha ciełaskładu, jaki aktyŭna zajmaŭsia sportam».
Jury Jurkaviec pamior a 9‑j ranicy 2 žniŭnia padčas snu. U śnie staŭ zadychacca, nia zdoleŭ pračnucca, žonka vyklikała chutkuju. Pavodle papiaredniaha dyjahnazu, pryčynaj śmierci staŭ infarkt.
Źmicier Saŭka padzialiŭsia ŭspaminami pra Ju. Jurkaŭca:
Jury Jurkaviec naradziŭsia 25 lutaha 1962 h. u Śvietłahorsku. Dziacinstva pravioŭ u v. Čyrkavičy Śvietłahorskaha r‑nu. Na jaho mocna paŭpłyvaŭ dzied Mitrafan, jaki navučyŭ unuka biełaruskaj movie. Dzied byŭ vielmi daścipnym čałaviekam i dobrym apaviadalnikam. I, napeŭna, jaho talent pieradaŭsia ŭnuku.
… Pa skančeńni škoły Jurkaviec padaŭsia ŭ Sankt‑Pieciarburh (tady jašče Leninhrad), pahatoŭ tady praź Śvietłahorsk išła čyhunka, i tradycyjna žychary Ŭschodniaj Biełarusi źjaždžali ŭ vialikija harady. U horadzie nad Niavoj prajšoŭ pieršyja žyćciovyja ŭniversytety. Tam ža pačaŭ rabić pieršyja litaraturnyja nakidy. Ale chutka viarnuŭsia ŭ Biełaruś, dzie pastupiŭ na rasiejskaje adździaleńnie fiłfaku BDU, jaki skončyŭ u 1990 h.
Razam z žonkaj raźmierkavaŭsia ŭ miastečka Illa (Vialejskaha r-nu), dzie ŭ svoj čas pracavaŭ Aleś Sałaviej. Ju. Jurkaviec vykładaŭ u škole biełaruskuju movu, žonka Elvira — rasiejskuju. «Adnaho razu pabačyŭšy na ŭroku, jak paŭzie voš pa šyi dziciaci, ja zrazumieŭ, što apošniaja kropka, što treba ŭciakać», — zhadvaŭ Jurkaviec. Siamja viarnułasia ŭ Miensk, prabyŭšy ŭ Illi hod.
Jury Jurkaviec zaniaŭsia biznesam, u jakim apracavaŭ ŭsie hady, apošnija dziesiać hod zajmaŭsia padšypnikami.
«Ale jahonaja duša naležała litaratury, — kaža Z. Saŭka. -- Jurkaviec šmat pisaŭ i čytaŭ. Jon litaralna straciŭ zrok na čytańni knih. Prychodziŭ u hości, braŭ z palicy knihu, siadaŭ na kanapu i čytaŭ».
Naturalna, šmat pisaŭ, pa biełarusku i pa‑rasiejsku. Pieršaja jahonaja premija — za publikacyju ŭ časopisie «Dajvinh», sioleta jon atrymaŭ rasiejskuju premiju «Błohbaster».
Baćki pamierli ŭ minułym hodzie, adzin za adnym. Ad dzieda ŭ spadčynu zastałasia pasieka, i kali baćka zaniamoh, Jury staŭ razvozić hety miod ludziam.
Pa Jurkaŭcy zastaŭsia syn Anton, vypusknik Kołasaŭskaha liceja. Siońnia jon navučajecca ŭ BDU n specyjalnaści serbskaja mova.
Apaviadańnie Ju. Jurkaŭca «Ruka klasyka»
