AAT «Hazprom» dahetul nie atrymaŭ ad biełaruskaha boku aficyjnaha adkazu na svajo paviedamleńnie ab 45‑pracentnym skaračeńni pastavak hazu z 3 žniŭnia. Pra heta BiełaPAN paviedamili 2 žniŭnia ŭ rasijskim hazavym kancernie.
Nahadajem, 1 žniŭnia «Hazprom» nakiravaŭ na adras vykanaŭcy abaviazkaŭ hienieralnaha dyrektara AAT «Biełtranshaz» Uładzimira Majorava aficyjnaje paviedamleńnie ab skaračeńnie abjomaŭ hazavych pastavak Biełarusi ŭ suviazi ź nievykanańniem abaviazacielstvaŭ pa apłacie atrymanaha ŭ pieršym paŭhodździ 2007 hoda hazu i adsutnaściu harantyj apłaty. Pavodle źviestak rasijskaha kancerna, zapazyčanaść Biełarusi ŭ studzieni‑červieni skłała 456,16 młn. dołaraŭ.
Paśla atrymańnia aficyjnaha papiaredžańnia pamočnik ministra enierhietyki Biełarusi Andrej Žukaŭ paviedamiŭ, što Minsk rychtuje «Hazpromu» prapanovy pa ŭrehulavańni pytańniaŭ, jakija, pavodle jaho słoŭ, abmiarkoŭvajucca ŭ biełaruskim uradzie z udziełam kiraŭnictva AAT «Biełtranshaz». Adnak va ŭradzie hetuju infarmacyju nie paćviardžajuć.
Miž inšym u intervju ahienctvu Rejter pradstaŭnik «Hazproma» paviedamiŭ, što «biełarusy ničoha nie prapanavali, nijakich varyjantaŭ pa vyrašeńni prablemy doŭhu». Ciapierašniaja situacyja, pavodle jaho słoŭ, «pryncypova adroźnivajecca ad padziej šaścimiesiačnaj daŭniny». «Jany (biełaruski ŭrad. — BiełaPAN.) hrošy sa spažyŭcoŭ źbirali ŭ poŭnym abjomie. Aprača taho, my zapłacili 625 miljonaŭ dołaraŭ za «Biełtranshaz». Tak što ŭsie hetyja ich tłumačeńni nam niezrazumiełyja», — zaznačyŭ pradstaŭnik «Hazproma».
Pra svaju hatoŭnaść pryciahnuć dla «Biełtranshazu» kredytnyja resursy da 500 młn. dołaraŭ zajaviŭ 1 žniŭnia staršynia praŭleńnia «Biełhazprambanka» Viktar Babaryka. Pavodle jaho słoŭ, mahčymaść vydačy kredytu «isnuje i vykładziena ŭ kankretaj prapanovie», ale sprava ab vydačy pazyki «nie za bankam, a za atrymalnikam kredytu».
Na dumku V.Babaryki, u Biełarusi jość niekalki varyjantaŭ apłaty doŭhu za pastaŭleny haz. U pryvatnaści, apłata z zołatavalutnaha reziervu krainy, pryciahnieńnie zamiežnych resursaŭ, u tym liku rasijskich; daterminovy prodaž akcyj «Biełtranshazu», raźmiaščeńnie akcyj na depazit, a taksama apłata doŭhu ŭ biełaruskich rublach, kali «rasijski bok budzie viedać, kudy vykarystać hetyja hrošy», naprykład na apłatu pakieta akcyj «Biełtranshazu».
