Što ŭ suchoj astačy paśla siońniašnich zajaŭ Łukašenki ŭ redakcyi "SB"?
1. Hazavaj vajny nia budzie. Hrošy raspłacicca z "Hazpromam" u krainie jość. Pryčym banalnaje spłočvańnie zapazyčanaści nabyvaje pijaraŭski efekt: chaj zadušacca kryvasmoki! Miensk znachodzić mahčymaść dramatyzavać siužet enerhietyčnych stasunkaŭ navat tady, kali, zdavałasia b, usio prapisana ŭ miždziaržaŭnych papierach na niekalki hadoŭ napierad.
2. Ahučany sakret Polišynela što da planaŭ Maskvy: "Jany chacieli b pryvatyzavać usiu krainu". Toje, što niezaležniki dziaŭbli ŭvieś čas "bratniaj intehracyi", kali ŭ Kramli bilisia čarki na ščaście. Siońnia — pachmielny syndrom. Jakoje tam, da djabła, słavianskaje braterstva! Chcivym rasiejcam supraćpastaŭlajucca spahadlivyja kitajcy dy ščodry Čaves.
3. Kinuty čarhovy važki kamień u harod Pucina: "Mnie taksama namiakali, što treba jechać u Kreml i paści na kalena. Ja nie pajedu i na kalena nia ŭstanu". Karaciej, hetyja dva prezydenty kašy ŭžo nia zvarać adnaznačna.
4. Miž inšym: zacisnuć naš internet:( Kali ŭžo sam prezydent skazaŭ, što patrebien zakon, kab spynić tam "anarchiju", to buduć "navodzić paradak" z takoj samaj vytančanaśćiu, jak i ŭsiudy.
Ale vierniemsia da lejtmatyvu: "Jany chacieli b pryvatyzavać usiu krainu".
Adšlifavanaja antykramloŭskaja rytoryka starych niezaležnikaŭ zaraz nadta prydałasia aficyjnamu kiraŭniku. Ale veteranam ruchu nia śled chutčej krucić na štryfielach dzirački pad ordeny za toje, što stolki hadoŭ źbierahali śviatyja idei. Jak zajaŭlaŭ niekali Astap Bender paviatovamu pravadyru dvaranstva, "ia adzin zdoleju dać rady vašaj spravie". Ciapierašniaja ŭłada pryvykła manapalizavać usio, i zaraz jana vam razhonicca pryznavać niečyja aŭtarskija pravy na lozunhi abarony suverenitetu! (Što zaśviedčyli, darečy, padziei ŭ źviazku z uhodkami deklaracyi 27 lipienia, kali zusim nia strašnyja dla viarchoŭ prajavy vuličnaj aktyŭnaści staranna kupavalisia).
Miž tym na chcivuju Maskvu zručna budzie paviesić zaraz i skasavańnie lhotaŭ (zadnim dniom, chto tam raźbiarecca cieraz paŭhodu!), i nieminučaje padvyšeńnie žyllova-kamunalnych taryfaŭ, i inšyja symptomy zaciahvańnia pajasoŭ (znoŭ, maŭlaŭ, adarvali ad veteranaŭ, ad čarnobylcaŭ, kab spłacić daninu nienažernym aliharcham).
Kali ž adsunuć u bok badzioryja zajavy pra našu niazłomnaść (pa vialikim rachunku spryjalnyja dla drejfu masavaj śviadomaści ŭ niezaležnickim kirunku), to vidavočna: sytuacyja surjoznaja. Faktyčna miž Mienskam i Maskvoj idzie chałodnaja vajna. Dyj to skazać: padčas klasyčnaj chałodnaj vajny Saviecki Sajuz spraŭna pampavaŭ enerhanośbity ŭ lahier "imaviernaha praciŭnika"! A ŭ nas tut kožnyja paŭhodu — ruka na ventyli!
Biełaruski siužet dramatyzujecca. Tak, usio mahło być inačaj, kab 13 hadoŭ tamu vybrali inšy kurs, inšuju paradyhmu raźvićcia. Ja i sam nie adnojčy zhadvaŭ pra idei Bałta-Čarnamorskaha kalektara etc. Ale ž tuju stancyju daŭno prajechali. I kudy niasiecca ciahnik, ci pašencić pieravieści strełki ŭ čarhovym punkcie bifurkacyi — pytańnie zusim nie vidavočnaje.
Fakt toje, što siońniašnija vykliki tyčacca nia tolki ŭłady, ale ŭsich elitaŭ, zakranajuć usich biełarusaŭ. Pany pili, a ŭ nas hałovy balać:)
