Ameryka navažyłasia vučyć vizavym bizunom užo nia tolki najvyšejšaje biełaruskaje načalstva, ale i słužboŭcaŭ drabniejšaha ranhu. U "hrupu ryzyki" (i, musić, niemałoj) pry zvarocie pa vizy trapili, naprykład, usie pałkoŭniki dy hienerały KHB i MUS, dyrektary dziaržaŭnych pradpryjemstvaŭ, ichnija namieśniki etc. Plus ichnija "druhija pałovy". Lidzija Jarmošyna adrazu zhadała pra Deklaracyju pravoŭ čałavieka.
Analityk Valer Karbalevič zaŭvažaje, što vonkava hety krok ZŠA vyhladaje jak vodhuk na prapanovy apazycyi. Ź jaje lahieru nie adnojčy hučała dumka: efekt budzie tady, kali pad sankcyi patrapiać nie adzinki, a tysiačy słužak režymu, datyčnych da falsyfikacyjaŭ dy palityčnaha pieraśledu. Razam z tym, moj surazmoŭca sumniajecca, ci zdolejuć amerykancy dać rady kalasalnaj pracy.
Sapraŭdy, na dyletancki rozum, kab henaje sita pracavała spraŭna, musić, treba ŭsich čynoŭnikaŭ z adpaviednych katehoryj "pastavić na ŭlik", adsočvać kadravyja źmieny, mieć śviedčańni dačynieńnia da represij ci inšych niadobrych spraŭ suprać demakratyi… Badaj, u ambasadzie i štatu nia chopić.
Vy skažacie: dyk ža kamputary i ŭsio takoje! Ale navat raniej, kali ŭ čornym śpisie fihuravała tryccać ź niečym asobaŭ, chto-kolviek, zdajecca, praskokvaŭ praz toje sita. A tut, musić, lik pojdzie na sotni ci navat tysiačy (adnaho dyrektaratu vuń kolki!).
Akramia taho, ci vyrašajecca zvyšzadača? Meta takich sankcyjaŭ, miarkuje Valer Karbalevič, kali nia zmusić namenklaturu da pierachodu ŭ apazycyju, dyk sama mała adšturchnuć ad pracy na ciapierašni režym. Ale ŭ nas nia taja sytuacyja.
Tak, revalucyjaj nia pachnie, i čynavienstva lepiej pieratopčacca biez zaakijanskich vajažaŭ, čym horda admovicca ad nasiedžanych kresłaŭ. Tym bolej što, sa słoŭ majho surazmoŭcy, "naŭrad ci pałkoŭniki KDB masava jeździać u Štaty". Dadamo: a čyjaści "nievyjaznaja" žonka chutčej abłaje Buša, čym muža.
Ale kali surjozna, dyk voś palitolah Andrej Fiodaraŭ, u svaju čarhu, miarkuje, što metadyčnyja persanalnyja sankcyi majuć sens, i čym šyrejšaje koła namenklatury pad ich padpadaje, tym bolej imavierny efekt. Jon nahadvaje, što i kiraŭnik Biełarusi, i niekatoryja inšyja słužbovyja asoby, taja ž Lidzija Jarmošyna, naprykład, nie adnojčy vykazvali razdražnieńnie z nahody vizavych tabu. Naŭrad ci heta spadabajecca i drabniejšamu čynavienstvu. "Kropla kamień točyć", — reziumuje Fiodaraŭ.
Ź inšaha boku, kamieniu ŭžo katory hod ničoha nia robicca, a voś apazycyju datruščvajuć. I kožny raz, jak Zachad užyvaje niejkija sankcyi, u nas razharajecca dyskusija: ci nia bolej škody, čym karyści? Ci nia ŭdaryć heta rykašetam pa apanentach ułady?
"Apazycyju ŭ nas represujuć planava, a nie ŭ adkaz na niejkija sankcyi Zachadu", — skazaŭ u hutarcy sa mnoj palitolah Vital Silicki. Na jahonuju dumku, novaje rašeńnie Vašynhtonu jość demanstracyjaj pryncypaŭ pry adsutnaści mocnych vaharoŭ realnaha ŭździejańnia.
Zrešty, usie troje maich surazmoŭcaŭ byli salidarnyja ŭ tym, što naŭprostavaj suviazi miž zachodnimi sankcyjami i represijami suprać apazycyi niama. Pravakujucca chiba što pijaraŭskija naskoki: znoŭ "piataja kalona" pastarałasia zapeckać imidž siniavokaj krainy!
Nasamreč naviersie vydatna razumiejuć, što nie praź Labiedźku ź Viačorkam tak nia lubić našaje načalstva Buš. Darečy, nia spraŭdzilisia (pastukaju pa drevie, kab nie suročyć!) zaściarohi, što paśla vykindesu z preferencyjaŭ u nas datruščać niezaležnyja prafsajuzy. Raz-druhi drobna kusnuli Jarašuka ź Fiadyničam — i nibyta adčapilisia. Nie tamu, što takija dobryja stali, a tamu što jość spadzieŭ niekali tyja preferencyi adnavić.
"Najvyšejšaje kiraŭnictva daŭno ŭ śpisach nieŭjaznych, — adznačaje Andrej Fiodaraŭ. — I naŭrad ci jano tak užo budzie pieražyvać, što zaraz mohuć admović u vizie namieśniku dyrektara niejkaj meblevaj fabryki. Niechta naviersie mo' navat i pazłaradničaje: chaj i jany pakaštujuć…".
Karaciej, za fihuralnaha namieśnika dyrektara meblevaj fabryki masavymi pasadkami tutejšych zmaharoŭ pomścić dziadźku Semu nia stanuć. Kali što, ich dastanuć "u planavym paradku". Nu a Vašynhton pakul što chutčej symbalična nahadvaje vertykali: "Nichto nie zabyty, ništo nie zabyta!"
