Sud Partyzanskaha rajona Minska 8 žniŭnia pryhavaryŭ maładziožnaha aktyvista Alaksieja Šydłoŭskaha da piaci sutak administracyjnaha aryštu pa artykule 17.1 Kodeksa ab administracyjnych pravaparušeńniach (drobnaje chulihanstva). Sud ustanaviŭ, što Šydłoŭski vinavaty ŭ "aburalnych pavodzinach u hramadskim miescy" 24 lipienia i niecenzurna vykazvaŭsia ŭ adras supracoŭnikaŭ milicyi.
Admietna, što A.Šydłoŭski 25 lipienia ŭžo byŭ asudžany na 15 sutak za anałahičnaje pravaparušeńnie, učynienaje im nibyta 25 lipienia. Termin jaho aryštu praktyčna zakončyŭsia, adnak jon znoŭ byŭ pakarany za "drobnaje chulihanstva", na hety raz učynienaje nibyta 24 lipienia. U budynak suda Partyzanskaha rajona 8 žniŭnia A.Šydłoŭski byŭ dastaŭleny pad kanvojem.
Alaksiej Šydłoŭski razam ź jašče adnym aktyvistam maładziožnaha demakratyčnaha ruchu Paŭłam Baranoŭskim byli zatrymany 24 lipienia ŭ centry Minska padčas rasklejvańnia ŭlotak apazicyjnaha źmiestu. Noč zatrymanyja praviali ŭ śpiecpryjomniku-raźmierkavalniku HUUS Minharvykankama. Ranicaj 25 lipienia jany byli dastaŭleny ŭ sud Partyzanskaha rajona, ale pasiadžeńnie suda było pieraniesiena na 8 žniŭnia z-za taho, što nie źjavilisia śviedki z boku abvinavačańnia. Maładych ludziej vyzvalili z-pad varty ŭ zale suda. Adnak praź niekalki hadzin A.Šydłoŭski znoŭ byŭ zatrymany i dastaŭleny ŭ sud, jaki pryhavaryŭ jaho da 15 sutak administracyjnaha aryštu pa artykule 17.1 Kodeksa ab administracyjnych pravaparušeńniach (drobnaje chulihanstva).