31 lipienia
Prysudzili, ale nie pakarali
Alaksandar Dziamieščyk, sudździa Smurhonskaha rajonu, vynies pastanovu pa administracyjnaj spravie ŭ dačynieńni da hramadzkaha aktyvista Ŭładzimiera Šulžyckaha. Chłopiec abvinavačvaŭsia ŭ tym, što 24 krasavika 2007 hodu kala 18 hadzin, vychodziačy razam ź milicyjantami z padjezdu domu pa vuł.Jubilejnaj u Smurhoniach, niecenzurna łajaŭsia. Sudździa ŭ svaim rašeńni kanstatavaŭ, što vina Ŭładzimiera Šulžyckaha ŭ chulihanstvie paćvierdžanaja, ale ŭ suviazi z zakančeńniem 3‑miesiačnaha terminu dla pryciahnieńnia da adkaznaści za administracyjnaje pravaparušeńnie jon spravu spyniaje.
1 žniŭnia
«Viasna» rehistrujecca
Hrupa pravaabaroncaŭ padała ŭ Ministerstva justycyi dakumenty na rehistracyju hramadzkaha pravaabarončaha abjadnańnia «Viasna». Arhanizacyja źjaŭlajecca pierajemnicaj pravaabarončaha centru «Viasna», jaki byŭ likvidavany Viarchoŭnym sudom u kastryčniku 2003 hodu.
Pamiaci źnikłych
A 9 hadzinie viečaru ŭ padziemnym pierachodzie kala stancyi metro «Instytut kultury» ładziŭsia łancuh nieabyjakavych ludziej. Moładź stajała z partretami źnikłych palitykaŭ.
Za adnu nalepku
Siabra Partyi BNF Ściapana Śvidzierskaha pastanovaju administracyjnaj kamisii Leninskaha rajonu Horadni aštrafavali na 4 bazavyja vieličyni. Chłopca abvinavacili u tym, što jon nalapiŭ adnu (i heta zafiksavana ŭ pratakole) nalepku na ścianu budynku.
2 žniŭnia
Italjancy pra Čarnyšova
U ramkach seryi muzyčnych viečaroŭ u italjanskaj pravincyi Kazerta muzyki pryśviacili svoj vystup biełaruskamu moładzievamu aktyvistu Alaksandru Čarnyšovu, jaki sustreŭ svoj dzieviatnaccaty dzień naradžeńnia ŭ specpryjomniku‑raźmierkavalniku na Akreścina.
Pakarali štrafami
Sud Leninskaha rajonu Miensku aštrafavaŭ moładzievych aktyvistaŭ apazycyi Janiu Karpovič, Sieržuka Pałaŭkova i Artura Dasanava na dźvie bazavyja vieličyni (62 tys. rub.). Ich zatrymali na pryvatnaj kvatery 1 žniŭnia ŭviečary. Noč usich trymali ŭ milicyi, a ranicaj skłali pratakoły nibyta za niecenzurnuju łajanku.
Vyjšli na volu
Na volu sa specpryjomniku‑raźmierkavalniku pa Akreścina vyjšli aktyvisty moładzievaha ruchu — Siarhiej Klujeŭ, Valancin Sakałoŭski i Alaksiej Bondar.
Kab nie traplali ŭ psychuški
Mižnarodnaja asacyjacyja abarony pravoŭ čałavieka vystupiła inicyjataram stvareńnia ŭ Biełarusi niezaležnaj psychijatryčnaj ekspertyzy.
3 žniŭnia
Kalita patrabuje kampensacyi ad mytni i KDB
Moładzievy lider Aleś Kalita padrychtavaŭ pazoŭ u sud ab spahnańni z supracoŭnikaŭ ašmianskaj mytni i KDB materyjalnaha ŭronu, jaki aktyvist atrymaŭ pa pryčynie naŭmysnaha paškodžańnia jaho noŭtbuku. Jašče ŭ studzieni pry pierasiačeńni biełaruska‑litoŭskaj miažy ŭ Kality kanfiskavali noŭtbuk, viarnuli bolš čym praz paŭhodu. Pryčym, złamany. Naniesieny ŭron u sumie 321 tys. rubloŭ.
Letnik pad Vałožynam
Ranicaj supracoŭniki Vałožynskaha RUUS i rajonnaj sanepidemstancyi źjavilisia ŭ namiotavym lahiery la raki Isłač na Vałožynščynie, dzie adpačyvali pradstaŭniki demakratyčnych moładzievych arhanizacyj. Jany zahadali moładzi zharnuć lahier. Paśla pravierki pašpartoŭ dziaŭčynu i nakalki junakoŭ milicyjanty zatrymali i dastavili ŭ Vałožynski RUUS. Zatym, paśla pieramovaŭ z načalstvam, usich adpuścili, ale papiaredzili, kab chutčej pakinuli terytoryju rajonu.
Milicyja z narodam
Aktyvisty kampanii «Džyns za Svabodu!» praviali akcyju kala adnaho z apornych punktaŭ milicyi ŭ Frunzenskim rajonie Miensku. Na elektryčnych dratach nasuprać apornaha punktu byŭ vyviešany bieł‑čyrvona‑bieły ściah, a na ścianie adnaho ź dzieviacipaviarchovych damoŭ — raściažka «Milicyja — z narodam!»
4 žniŭnia
Mižnarodnaja salidarnaść
Mižnarodnaja Federacyja Pravoŭ Čałavieka (FIDH) vykazała najvialikšuju zakłapočanaść chvalaj advolnych aryštaŭ i zatrymańniaŭ aktyvistaŭ apazycyi napiaredadni 27 lipienia 2007.
U Eŭropu!
Na Mahiloŭskaj trasie kiroŭcy aŭtamabilaŭ mahli nazirać za cikavaj akcyjaj. Dvaccać maładych ludziej z tabličkami «U Eŭropu» stali ŭ kalonu. Zaviaršaŭ kalonu novy darožny znak: źvierchu było napisana «Eŭropa», źnizu «BY», a pasiaredzinie byŭ namalavany symbal razvarotu na 180 hradusaŭ.
6 žniŭnia
Pieramoha donaraŭ
Mahiloŭskija donary damahlisia pieršaj pieramohi ŭ spravie viartańnia skasavanych ilhotaŭ. Pa słovach aktyvista, hanarovaha donara Ihara Kavalenki, Saviet ministraŭ vyrašyŭ pakinuć donaram 40‑pracentnuju nadbaŭku da pensii.
Pradprymalniki na płoščy
150 pryvatnych pradprymalnikaŭ vyjšli na hałoŭnuju płošču Śvietłahorsku da budynku rajvykankamu. Jany pratestavali suprać dziejańniaŭ milicyjantaŭ i miascovaj padatkovaj słužby, jakija časta kanfiskoŭvajuć tavar.
Znoŭ zatrymańni
Supracoŭniki milicyi Leninskaha rajonu Miensku 5 žniŭnia zatrymali dvuch aktyvistaŭ Abjadnanaj hramadzianskaj partyi — Arcioma Dareŭskaha i Alaksandra Sierhijenku.
U ich zaplečnikach znajšli hazety «Svabodu Biełarusi». Paśla składańnia pratakołaŭ usie 400 ekzemplaraŭ hazety byli kanfiskavanyja. Junakoŭ źniali na videa i ŭziali adbitki palcaŭ. Paśla troch hadzin zatrymańnia jany byli adpuščanyja.
