Byłomu varataru nacyjanalnaj zbornaj Biełarusi pa futbole Valeryju Šantałosavu budzie pradjaŭlena abvinavačańnie ŭ ramkach kryminalnaj spravy. Pra heta ministr unutranych spraŭ Uładzimir Navumaŭ paviedamiŭ 9 žniŭnia padčas anłajn‑kanfierencyi na sajcie Biełteleradyjokampanii.
Jak paviedamlałasia raniej, kryminalnaja sprava pa č. 5 art. 16 (saŭdzieł u złačynstvie) i č. 1 art. 253 (podkup udzielnikaŭ i arhanizataraŭ prafiesijnych spabornictvaŭ i vidoviščnych kamiercyjnych konkursaŭ) była raspačata ŭ dačynieńni da V.Šantałosava respublikanskaj prakuraturaj u červieni 2005 hoda. Padstavaj staŭ artykuł, apublikavany ŭ haziecie «Priessboł». Potym jaje hałoŭny redaktar daŭ pakazańni, zhodna ź jakimi zapisy razmovy pamiž budučym abvinavačvanym i inšym hulcom zbornaj, jakomu prapanoŭvalisia hrošy, u redakcyju byli padkinuty.
Śledstvam ustanoŭlena, što ŭ 2003 hodzie V.Šantałosaŭ niekalki razoŭ sustrakaŭsia ź inšym hulcom nacyjanalnaj kamandy (u toj čas — dziejnym varatarom) i prapanoŭvaŭ jamu niekalki dziesiatkaŭ tysiač dołaraŭ za projhryš z patrebnaj roźnicaj miačoŭ. Razmova išła pra vieraśnioŭskija matčy Biełarusi z Čechijaj i Małdovaj u ramkach hrupavoha adboračnaha turniru čempijanatu Jeŭropy‑2004.
Ciapier V.Šantałosaŭ znachodzicca ŭ Rasii, u Biełarusi jon abjaŭleny ŭ vyšuk.
«Jość peŭnyja ciažkaści: jon (Šantałosaŭ) — u Rasijskaja Fiederacyi, my — u Respublicy Biełaruś, jość jašče niekatoryja tonkaści», — zaznačyŭ Navumaŭ. Pavodle słoŭ ministra, «pa hetaj kryminalnaj spravie pretenzii buduć pradjaŭlacca tolki da Šantałosava». Jon «sprabavaŭ peŭnymi dziejańniami ŭździejničać na hulcoŭ, na što hulcy nijak nie adreahavali», skazaŭ Navumaŭ. Ministr padkreśliŭ, što ni da adnaho hulca nacyjanalnaj zbornaj u MUS pretenzij niama. «Hetaja sprava dastatkova doŭha rasśledavałasia. Ni pa adnym hulcu nacyjanalnaj zbornaj niama dokazaŭ, što jon sprabavaŭ uździejničać na źmianieńnie vyniku», — skazaŭ kiraŭnik MUS.
