9 žniŭnia abjaŭleny tender na zakupku abstalavańnia dla spadarožnikavaha telekanała «TV Biełaruś» (handlovaja marka «Biełsat»). Pra heta BiełaPAN paviedamiła kaardynatar prajekta, supracoŭnica Polskaha hramadskaha telebačańnia (TVP) Ahnieška Ramašeŭska.
Pavodle jaje słoŭ, zajaŭki na ŭdzieł u tendery možna padavać na praciahu 46 dzion, zatym budzie praviedzieny konkursny adbor pastaŭščyka abstalavańnia.
Ciapier praciahvajecca stažyroŭka dla biełaruskich žurnalistaŭ, jakija poruč z polskimi buduć pracavać na telekanale. «Usiaho stažyroŭku prajšło kala 120 čałaviek, ź jakich byli adabrany samyja lepšyja», — paviedamiła A.Ramašeŭska. Na terytoryi Biełarusi, pavodle jaje słoŭ, buduć pracavać bolš za 30 čałaviek, u Varšavie — jašče 42.
Zapusk kanała zapłanavany na listapad hetaha hoda. «Ja nie chaču nazyvać dakładnuju datu, pakul nie daviedajusia pra vyniki tendera. Bo kali my nie zakupim abstalavańnie, usie terminy ssunucca», — zaznačyła A.Ramašeŭska.
Nahadajem, što pahadnieńnie ab stvareńni spadarožnikavaha telekanała «TV Biełaruś» było padpisana 23 krasavika 2007 hoda pamiž TVP i Ministerstvam zamiežnych spraŭ Polščy. 18 lipienia TVP zaćvierdziła ŭ svajoj struktury novy spadarožnikavy telekanał. «TV Biełaruś» budzie finansavacca z reziervovaha biudžetu MZS Polščy. Sioleta dla «TV Biełaruś» vydzialajecca 16 młn. złotych (kala 4 młn. jeŭra).
