9 žniŭnia Haspadarčy sud Homielskaj vobłaści pryznaŭ arhanizataraŭ kancertu biełaruskamoŭnych bardaŭ vinavatymi ŭ ažyćciaŭleńni niezakonnaj pradprymalnickaj dziejnaści. Łarysie Ščyrakovaj i Dźmitryju Žaleźničenku nieabchodna vypłacić štraf u pamiery 10 bazavych vieličyń (310 tysiač rubloŭ).
Siońnia ŭ sud byli zaprošany śviedki, jakija napisali zajavu ŭ inśpiekcyju pa padatkach i zborach ab tym, što jany płacili za kancert nieznajomamu maładomu čałavieku. Pavodle ich słoŭ, chłopiec stajaŭ na ŭvachodzie ŭ pamiaškańnie, dzie prachodziŭ kancert, sa skryniaj, padobnaj da vybarčaj skryni. Śviedki abvinavačańnia - Piotr Valajeŭ, Anton Janačkin i Stanisłaŭ Łapyka - śćviardžali, što jany kinuli ŭ hetu skryniu pa 5 tysiač rubloŭ. Na padstavie zajaŭ hetych śviedak padatkovaja inśpiekcyja pryciahnuła arhanizataraŭ kancerta da adkaznaści za niezakonnuju pradprymalnickuju dziejnaść.
Pavodle słoŭ śviedak abvinavačańnia, Ł.Ščyrakovu i D.Žaleźničenku jany nie viedajuć. Maładyja ludzi taksama nie stali tłumačyć, ź jakoj metaj jany źviarnulisia ŭ padatkovuju inśpiekcyju.
«Niahledziačy na toje, što pradprymalnickaja dziejnaść praduhledžvaje sistematyčnaje atrymańnie prybytku, sud vynies rašeńnie pryznać Ščyrakovu i Žaleźničenku vinavatymi. Ale ž jany nie atrymali nijakaha dachodu ad kancerta, i heta było dakaza ŭ sudovym pracesie. Liču, što heta sprava całkam palityzavanaja», - zajaviŭ Leanid Sudalenka, jaki pradstaŭlaŭ u sudzie intaresy arhanizataraŭ kancerta.