Upieršyniu ŭ historyi sioleta biełaruski klub trapiŭ u treci kvalifikacyjny raŭnd Lihi čempijonaŭ pa futbole. BATE pa čarzie pieramoh kiprski “Apael” i iślandzki “Chafnafjordziur”. Apošnim ža barjeram da hrupavoha turniru Lihi čempijonaŭ dla barysaŭcaŭ staŭ bucharescki “Ściaŭa”. Rumyn ciapier treniruje lehiendarny ŭ minułym futbalist Hieorhi Chadžy. jakoha niekali nazyvali bałkanskim Maradonnam.
Barysaŭski haradzki stadyjon byŭ zabity całkam, redka dzie vidnielisia volnyja miescy. Uvohule, futbalisty BATE pavinny być u značnaj stupieni ŭdziačnyja svaim zaŭziataram, jany tonka adčuvali sytuacyju i padtrymlivali kamandu ŭ samyja składanyja momanty.
Užo ź pieršych chvilinaŭ adčuvałasia, što rumyny vyšej klasam za našu kamandu, adnak niaredka ŭ futbole paradak bje klas. Pieršy tajm tolki paćvierdziŭ hetaje vykazvańnie. Na 40-oj chvilinie centralny abaronca BATE Arciom Radźkoŭ udała skarystaŭ adskok u štrafnoj “Ściaŭa” i ź niekalkich metraŭ adkryŭ lik – 1:0.
U druhoj pałovie sustrečy barysaŭcy vidavočna sastupali bucharestcam u śviežaści. Nia dziva, čempijanat našaj krainy ŭžo pieravaliŭ za ekvatar, a rumyny tolki vyjšli z adpačynku. Hetaja pieravaha chutka adlustravałasia na tablo. Ciapier užo centralny abaronca “Ściaŭa” Hajan ŭdała syhraŭ hałavoj u štrafnoj BATE – 1:1. A za šeść chvilin da finalnaha śvistka bliskučy ŭdar sa štrafnoha atrymaŭsia ŭ Dzikie – 1:2.
Rumyny mahli zabić jašče, ale nie imknulisia da hetaha, za što i byli pakaranyja. Užo ŭ dadatkovy čas lik vyraniŭ Hienadź Bliźniuk – 2:2.
Pačućcio prykraści źmianiła saboj nadzieja i aptymizm. Matč u adkaz projdzie praz dva tydni ŭ Buchareście. Šancy jašče zastajucca.
