Prezentacyja knihi, składzienaj z artykułaŭ, jakija Pavał Sieviaryniec štotydzień dasyłaŭ u «Našu Nivu» z «chimii», sabrała mnohich znakamitych ludziej Biełarusi.
Imprezu raspačaŭ sam aŭtar. Pieršym jon daŭ słova redaktaru hazety «Naša Niva» Andreju Dyńku — aŭtaru idei listoŭ ź lesu.
Nastupnym słova ŭziaŭ Hienadź Buraŭkin. Połaččyna — ciemiečka Biełarusi, skazaŭ jon: «I kali ŭdumvaješsia va ŭčynak Paŭła, to razumieješ, što ŭsie tyja siły, jakija supraćstajać biełaruščynie, imknucca ŭdaryć hramadztva mienavita pa ciemiečku, jak heta było ŭ vypadku sudu i sasłańnia Sieviarynca. I dla hramadztva ŭ taki čas samaje hałoŭnaje – zrazumieć heta, pačuć bol da taho, pakul vorah jašče nie raźbiŭ usiu hałavu».
Paśla hetych słovaŭ Buraŭkina Sieviaryniec pryznaŭsia čytačam, što ciapier u Miensku vielmi sumuje pa Sitnie.
Nastupny vystupoŭca – Uładzimier Arłoŭ – u svajoj pramovie taksama adznačyŭ, što ciapier jamu vielmi nie chapaje hetych miaścinaŭ, što jon vielmi sumuje pa Paŭłavaj pracy, pa katu Partyzanu, pa Źmitru Daškieviču, ź jakim niekalki razoŭ sustrakaŭsia ŭ Sitnie. Historyk zaznačyŭ, što pavodle adnaho z vyznačeńniaŭ, historyja – heta płoć času. «Nas usio žyćcio vučyli, što historyju robiać pracoŭnyja masy, praletaryjat i kamunisty, ale ciapier ja razumieju, što historyju robiać takija mužnyja ludzi jak Pavał»
Prezentacyju praciahnuli vystupy inšych litarataraŭ: paetaŭ Siarhieja Zakońnikava i Ŭładzimiera Niaklajeva, historyka Anatola Hryckieviča, a taksama palitykaŭ – lidera Ruchu «Za Svabodu!» Alaksandra Milinkieviča i «padzielnika» Sieviarynca Mikałaja Statkieviča.
U Paŭła Sieviarynca heta ŭžo piataja kniha.
Aŭtar idei "Listoŭ ź lesu" Andrej Dyńko žartam zapatrabavaŭ viarnuć sapahi, padoranyja Paŭłu: "Jany ž na balansie NN!" I paraiŭ sacyjolaham daśledavać upłyŭ pierabyvańnia Sieviarynca na masavuju śviadomaść siciencaŭ.
Arłoŭ uspomniŭ kata Partyzana i Paŭłavaha «supakojnika», jaki valaŭsia pad hankam.
Baćka Hienadzia Buraŭkina pracavaŭ u toj ža Aleščy, što j Sieviaryniec.
Pakaleńniu Siarhieja Zakońnikava pabyvać u ssyłkach nie daviałosia.
Milinkieviča ŭ Sitnie viedali ŭsie. «Kali ja da Sieviarynca padychodžu, to ščyra chaču stać lepšym. Chaču troški padciahnuć žyvot. I nia ja adziny».
Historyk Anatol Hryckievič listavaŭ Sieviaryncu štotydzień. "Taksama možna vydavać asobnaj knihaj!", - zaznačyŭ Sieviaryniec.
Padzielnik.
Paśla prezentacyi da Paŭła vystraiłasia čarha pa aŭtohrafy.
