 |
Treci hod zapar śpiecyjalisty rynku nieruchomaści pa arendzie žylla mienavita ŭ žniŭni adznačajuć istotnaje pavieličeńnie popytu na žyllo z boku inšaharodnich hramadzian krainy.
Ceny «skoknuli» ŭsiaho za tydzień
Rynak arendy žylla ŭ hałoŭnym miehapolisie krainy pačaŭ aktyvizavacca jašče ŭ apošnija dni lipienia, ale mienavita ź siaredziny minułaha tydnia ŭ horadzie ŭźnikła ažyjatažnaja chvala popytu na arendu žylla.
Pavodle infarmacyi načalnika adździeła arendy žylla ahienctva nieruchomaści «Čas pik» Siarhieja Kadoły, za apošnija 10 dzion prapanova arendy kvater pamienšyłasia prykładna ŭ dva razy, a za hety ž čas popyt pavialičyŭsia ŭ 2—3 razy. Mienavita tamu ceńnik na samyja tannyja kvatery pavysiŭsia ŭ siarednim na 20—50 dołaraŭ. Siońnia samaja minimalnaja cana arendy adnapakajovaj kvatery ŭ zahazavanym Zavodskim rajonie i Šabanach. Haspadary tamtejšych kvater žadajuć atrymać za svaje adnapakajoŭki 220—230 dołaraŭ. Bolš jakasnyja adnapakajoŭki ŭ spalnych rajonach kaštujuć prykładna 220—250 dołaraŭ. U centry adnapakajovyja kvatery kaštujuć užo nie mienš za 300 dołaraŭ. Minimalny ceńnik na arendu dvuchpakajovych kvater u Zavodskim rajonie, Šabanach i Čyžoŭcy pačynajecca z 250—260 dołaraŭ. U mikrarajonie Zialony Łuh dasiahaje 280—300 dołaraŭ plus apłata kamunalnych pasłuh. Dvuchpakajovyja kvatery siońnia, badaj, samaje zapatrabavanaje žyllo dla studentaŭ, jakija zdymajuć jaho na 3 ci navat 4 čałavieki. Samymi papularnymi tut ličacca Frunzienski i Maskoŭski rajony, a taksama novyja mikrarajony Malinaŭka i Sucharava. Mienavita ŭ hetych kropkach stalicy šmat novych damoŭ, tamu samaja vialikaja kolkaść prapanoŭ i adnosna nievysokija ceny. Razam z tym, ceńnik na kvatery zaležyć ad najaŭnaści pablizu mietro, abo kali dom znachodzicca pobač z tym abo inšym instytutam. U centralnych i elitnych rajonach stalicy arenda dvuchpakajovych kvater kaštuje ŭžo 400—500 dołaraŭ i bolš.
Amal na raniejšym uzroŭni zastaŭsia ceńnik arendy na trochpakajovyja kvatery, jaki vahajecca ŭ miežach 320—350 dołaraŭ. U Malinaŭcy i Šabanach takija kvatery kaštujuć kala 300 dołaraŭ plus kamunalnyja płaciažy. U centry horada arenda takoha žylla kaštuje ad 500 dołaraŭ i bolš. Čatyrochpakajovych kvater na druhasnym rynku arendy žylla vielmi mała i kaštujuć jany prykładna 300—350 dołaraŭ plus apłata «kamunałki».
Studentaŭ «sartujuć» pa vopratcy i… nie tolki
Naš ekśpiert ad ahienctva nieruchomaści «Čas pik» Siarhiej Kadoł ličyć, što mocny bum na arendu žylla ŭ stalicy vyklikali mienavita studenty‑pieršakurśniki. Heta sapraŭdy tak. Pavodle infarmacyi načalnika ŭpraŭleńnia kamiteta pa adukacyi Minharvykankama Andreja Stryhielskaha, zaraz u Minsku miescami ŭ internatach zabiaśpiečany tolki kala 68 pracentaŭ studentaŭ VNU. Takim čynam, sioleta jak i letaś samastojna žyllo pačali šukać kala 20 tys. studentaŭ.
Adnak zaraz haspadary žylla davoli aściarožna padychodziać da zdačy kvater mienavita studentam, jakija jašče ŭčora byli školnikami i žyli ŭ nievialikich haradach i vioskach krainy. Sprava ŭ tym, što studenty‑pieršakurśniki nie majuć vopytu viadzieńnia pieramoŭ nakont arendy žylla. Pošuk kvater dla ich ažyćciaŭlajecca bolš chutkimi tempami, kali ŭ hetym pracesie ŭdzielničajuć baćki byłych abituryjentaŭ. Mienavita jany i źjaŭlajucca peŭnaj harantyjaj dla haspadaroŭ žylla, u vypadkach, kali studenty, atrymaŭšy poŭnuju svabodu na novym miescy, pačynajuć kanfliktavać z susiedziami, rabić z kvatery maładziožny kłub, admaŭlajucca svoječasova płacić za kvateru i h.d. Asobnyja baćki «zialonych» studentaŭ pakidajuć numary svaich telefonaŭ ułaśnikam kvater i susiedziam, kab apošnija ŭ vypadku čaho sihnalizavali «na radzimu».
Isnuje jašče adzin varyjant dla studentaŭ — arenda asobnych pakojaŭ u zvyčajnaj kvatery adzinokich babulaŭ. Takimi varyjantami karystajucca hałoŭnym čynam studenty‑pieršakurśniki z prykładnymi pavodzinami, jakija jašče nie adšukali sabie sapraŭdnych siabroŭ, a dachodaŭ na asobnaje žyllo ŭ ich baćkoŭ niama. Ceny na asobnyja pakoi taksama kuślivyja. Pakojčyk z meblaj «pad kluč» kaštuje nie mienš 100 dołaraŭ, u Zavodskim rajonie i Šabanach možna adšukać niadrennaje pamiaškańnie i za 70—80 dołaraŭ. Siońnia najaŭnaść mebli, telefona abo televizara na košt arendy ŭžo nie ŭpłyvaje nijak. Pry zdačy žylla siamji na praciahły termin lepš mieć navat paŭpustuju kvateru, bo ŭ takich kvatarantaŭ jość užo svoj nabor mebli. Sučasnyja studenty siadzieć doma kala televizara taksama ŭžo nie buduć.
Ceny pavialičylisia i adkatu nie budzie?
Śpiecyjalisty arendy žylla ličać, što pavieličeńnie arendy kvater da maksimalnych pakazčykaŭ užo adbyłosia. Tak, u apošnija dni žniŭnia na chvali ažyjatažu 5—6 inšaharodnich klijentaŭ mohuć dazvolić sabie źniać i vielmi darahoje žyllo, ale heta pryncypova na druhasny rynak arendy ŭžo nie paŭpłyvaje.
Miž inšym, na dumku ekśpiertaŭ, isnujučyja ceny mohuć zachavacca i paśla spadu studenckaha ažyjatažu. Siarhiej Kadoł ličyć, što arenda adnapakajovych kvater zastaniecca na ŭzroŭni nie mienš jak 230—240 dołaraŭ. Na jakasnaje žyllo, jakoje prapanujecca pablizu VNU, mahčymy navat pavyšany popyt, a tamu i krychu zavyšanyja ceny.
Za pasłuhu lepš płacić pa faktu
A zaraz niekalki słušnych parad ab tym, jak šukać žyllo. Tyja studenty, u jakich z hrašyma sapraŭdy ciažka, zajmajucca pošukam kvater samastojna. Heta rasklejvańnie abjavak na słupach i hutarki pa dušach z babulami na łaŭkach. Taki miechanizm siońnia prynosić minimum vynikaŭ. Druhaja hrupa klijentaŭ raźmiaščaje svaje abjaŭki va ŭsich śpiecyjalizavanych vydańniach pa biaspłatnamu pryncypu i daje infarmacyju va ŭsie padobnyja pa tematycy Internet‑sajty. Bolšaja ž častka studentaŭ samastojna ci z baćkami nakiroŭvajecca ŭ ahienctvy nieruchomaści. Ahienctvy byvajuć roznyja: biełyja, šeryja i ŭvohule adnadzionki. Tak, śpiecyjalistami Miniusta tolki sioleta była prypyniena dziejnaść 14 ryełtarskich kampanij. Surazmoŭca ličyć, što samy nadziejny varyjant dla klijenta, kali apłata za pasłuhi ahienctva ažyćciaŭlajecca pa faktu zasialeńnia.
U ahienctvie «Čas pik» takaja pasłuha kaštuje 320 tys. rubloŭ. Tak, zhadziciesia, heta nie tanna. Razam z tym, pa słovach Siarhieja Kadoły, zaraz u stalicy isnuje šmat padobnych struktur, jakija prapanujuć klijentam tolki infarmacyju ab isnujučych varyjantach. Časam heta infarmacyja niepravieranaja, abo navat vydumanaja.
Razam z tym, lepš za ŭsio šukać kvatery praz znajomych i siabroŭ, jakich vy dobra viedajecie.
