 |
U Minsku i ŭsich abłasnych centrach dniom 23 žniŭnia ŭstanoŭleny novyja tempieraturnyja rekordy. Pali absalutnyja maksimumy, što trymalisia ad 39 da 69 hadoŭ.
Jak paviedamili BiełaPAN u Respublikanskim hidramieteacentry, u stalicy słupok termomietra padniaŭsia da adznaki 33,5 hradusa ciapła. Były rekord, što zafiksavany ŭ 1938 hodzie, byŭ roŭny plus 29,1 hradusa.
Novyja absalutnyja maksimumy ŭstanaŭlivajucca ŭ Minsku treci dzień zapar. 21 žniŭnia było zarehistravana 31,7 hradusa (29,9 u 2001 hodzie), 22 žniŭnia — 31,8 (30,9 u 1932 hodzie). Pakazčyk 23 žniŭnia byŭ u stalicy trecim za ŭsiu historyju mieteanazirańniaŭ u apošni miesiac leta razam z rekordam 30 žniŭnia 1992 hoda (taksama 33,5 hradusa). Absalutny maksimum žniŭnia ŭ Minsku — plus 34,4 hradusa (11 žniŭnia 1992 hoda), na druhim miescy — 33,7 hradusa (5 žniŭnia 1963 hoda).
U Hrodnie 23 žniŭnia zafiksavana 30,7 hradusa vyšej za nul (były rekord — 29,4 u 1968 hodzie), u Breście — 32,5 (30,3 u 1959‑m), u Viciebsku — 33,4 (30,9 u 1938‑m), u Mahilovie — 33,8 (31,1 u 1946‑m), u Homieli — 35,4 (31,6 u 1946‑m).
Na čatyroch mieteastancyjach tempieratura pieravysiła 35 hradusaŭ ciapła, što adpaviadaje katehoryi mocnaj śpioki. U Lelčycach (Homielskaja vobłaść) zarehistravana plus 36 hradusaŭ, paviedamili ŭ Respublikanskim hidramieteacentry.
24 žniŭnia ŭ Minsku čakajecca 29‑31 hradus ciapła pry absalutnym rekordzie hetaha dnia plus 31,7 (u 1938 hodzie).
