Maskoŭskaja hazeta "Vriemia novostiej" paviedamlaje: "Kiraŭnik PARE hatovy sustrecca z Łukašenkam". Zahałovak kryšku spekulacyjny. Z tekstu vynikaje, što sp. van der Linden hatovy tolki na peŭnych umovach.
Sam ža tekst — heta interviju ź Siarhiejem Hajdukievičam. Apošnimi dniami jon demanstruje ńjusmejkierski impet. Napiaredadni admysłovy pradstaŭnik ministra zamiežnych spraŭ Biełarusi prafihuravaŭ u paviedamleńniach šerahu ahiencyj z praklamavańniem pakietu imaviernych sastupak Mienska Eŭropie. U "Vriemieni novostiej" my bačym razhornuty varyjant tych samych tezaŭ.
Adznačym dva momanty. Pa-pieršaje, tonki namiok: "I kaniešnie, EZ nie zacikaŭleny, kab u Biełarusi źjavilisia novyja vajskovyja bazy". Pa-druhoje, intryha vakoł van der Lindena, jaki, maŭlaŭ, pasyłaje kanfidencyjnyja mesydžy Łukašenku praz Hajdukieviča.
Što da pieršaha punktu, dyk pra novyja bazy (pavodle zmaŭčańnia — zamiežnyja) kazać nie zusim karektna chacia b tamu, što u nas niama "starych". Pad Hancavičami dy Vialejkaj rasiejcy arandujuć vajskovyja abjekty, a heta inšy status. Faktyčna my tolki dazvalajem časova karystacca tymi cackami:) I našyja dziejačy ŭžo namiakali Maskvie, što mohuć pieradumać (pamiatajecie našumiełuju zajavu Čarhinca?).
Dumajecie, ad niama čaho rabić pad Picieram pabudavali bolej sučasny analah hancavickaj RŁS "Vołha"? Dyj vialejski punkt suviazi z atamnymi submarynami "Antej" choć i važny, ale nie taki ŭžo niezamienny dla Rasiei. U ichnim štabie VMS kažuć: kali što, u nas jość dźvie ŭłasnyja stancyi, zdolnyja zabiaśpiečyć suviaź z padłodkami ŭ lubym punkcie Ŭsiaśvietnaha akijanu.
Karaciej, rasiejskija kiroŭnyja koły ŭžo zrabili vysnovy nakont stupieni nadziejnaści chaŭruśnika. Jahonyja ž peryjadyčnyja abiacańni nie prapuścić tanki na Maskvu nia nadta kacirujucca z pryčyny nievialikaj aktualnaści samoj pahrozy:) Nu a kali Kreml zachoča asymetryčna adkazać na elementy supraćrakietnaj abarony ZŠA, dyk "Iskandery" možna pastavić u kalininhradzkim anklavie. Karaciej, stratehičny kozyr Miensku abiasceniŭsia.
Nakont van der Lindena.
Hety šanoŭny džentlmen užo atrymaŭ pilulaŭ za studzieński vajaž u "apošniuju dyktaturu". Zrešty, jon moža skarystać dla novaha vizytu niejkuju symbaličnuju sastupku kštałtu adkryćcia infarmacyjnaha biuro Rady Eŭropy ŭ biełaruskaj stalicy. Ofis, u jakim buduć razdavać brašurki miascovym pasyjanaram, vialikaj pahrozy dla režymu nie ŭjaŭlaje (chacia i heta, kaniešnie, nie zaškodziła b demakratyčnamu ruchu).
Ale ž hulni z van der Lindenam viaducca nie tamu, što jahonaja instytucyja najmacniejšaja ŭ Starym Śviecie. Naadvarot, Miensku jana bačycca słabym źvianom. U hetaj raznašersnaj arhanizacyi mała vaharoŭ upłyvu i davoli razmytaja palityka. Biełaruś ža navat była adnoj nahoj u PARE, pakul nia hrymnuŭ referendum-96!
Kudy bolej perspektyŭna — i najpierš z ekanamičnaha hledzišča — było b naładzić dyjaloh z Eŭraźviazam. Ale tam palityki bolej upartyja, čym prazvany "dobrym dziadziečkam" kiraŭnik PARE. Naŭrad ci ŭ Bruseli paličać praryŭnymi prapanovy, reklamavanyja Hajdukievičam. Dyj intryha vakoł niejkich sakretnych mesydžaŭ van der Lindena vyhladaje pijaraŭskaj.
