Niadaŭna ŭstupiła ŭ siłu pastanova Savieta ministraŭ ad 16 maja 2013 hoda № 384, jakaja ŭnosić źmieny ŭ paradak pierabudovy i pierapłaniroŭki žyłych i niežyłych pamiaškańniaŭ.

Dakumient vyklikaŭ mnostva pytańniaŭ u biełarusaŭ, bo zaraz uzhadniać treba praktyčna kožny krok, piša hazieta «7 dniej»: ad zamieny voknaŭ da pieranosu sušylni.

Ale samaje hałoŭnaje — čynoŭniki nie zmohuć dakazać, što vy ažyćciavili tyja pierabudovy paśla 16 maja 2013 hoda. Bo ž da 16 maja samastojnaja źmiena pakryćcia na padłozie była całkam lehalnaj.
A voś zaraz, naprykład, zaścialić padłohu łaminatam zamiest linoleuma, parkietam zamiest kaŭralinu samastojna zabaraniajecca.
Tłumačać heta śpiecyjalisty ŽESaŭ i ŽREA tym, što pry parušeńni technałohii kładki, što sustrakajecca niaredka, paharšajecca hukaizalacyja. Tearetyčna žychary, čyje pravy z-za ramontu parušanyja, mohuć padać pazoŭ u sud.

Zamiena voknaŭ u pakojach abo na bałkonie zapatrabuje ŭzhadnieńnia z ekspłuatujučaj arhanizacyjaj i ŭ hałoŭnaha architektara rajona. Dla hetaha spatrebicca napisać zajavu i na płan-schiemie namalavać malunak voknaŭ, jakija płanujecca pastavić. Kali, na dumku śpiecyjalistaŭ, prapanavany varyjant nie parušyć źniešniaje abličča fasada, na płan-schiemie pastaviać piačatku ab uzhadnieńni.

Kab ustalavać uvachodnyja mietaličnyja dźviery, daviadziecca prajści takuju ž praceduru, što i pry zamienie voknaŭ.

Adzinaje adroźnieńnie — spatrebicca prysutnaść paŭnaletnich členaŭ siamji, kab tyja paćvierdzili svaju zhodu.

Dazvoł ci ŭzhadnieńnie na pieranos sušylni patrebnyja. A voś prosta pamianiać dadzienaje abstalavańnie — možna bieź lišnich chadžeńniaŭ pa instancyjach. Adzinaje «ale» — nieabchodna vykanać technałohii i praviły.

Pastavić novyja mižpakajovyja dźviery ŭ ramkach taho ž praścienka možna biez usialakich uzhadnieńniaŭ. Vyklučeńnie: kali vy vyrašyli pamianiać dźviarnyja zaviesy (adkryćcio dźviarej) abo praścienak vyrašyli pašyryć, tady pryjdziecca pavazicca z papierami. Zrabić dźviery bolš abo zrušyć ich u bok možna, tolki atrymaŭšy dazvoł i skłaŭšy prajekt.

Kali kuchnia nievialikaja, dobrym rašeńniem stanovicca abjadnańnie jaje z haścioŭniaj. Ścianu pamiž dvuma hetymi pakojami znosiać zusim abo prabivajuć u joj arku i atrymlivajuć prastornaje pamiaškańnie. Ałharytm dziejańniaŭ u hetym vypadku prykładna taki ž, jak i pry pieranosie dźviarnoha prajomu: spatrebicca dazvoł vykankama i, viadoma, prajekt.

Pry hetym, zadumvajučy pierarobku, uličycie, što adkrytuju arku pamiž kuchniaj i žyłym pakojem mohuć dazvolić, tolki kali ŭ kvatery ŭstalavanaja… elektraplita. Kali ž plita hazavaja, to ŭ praścienak pryjdziecca pastavić dźviery ŭ luboj ich varyjacyi — kupe, harmonik, raschisnyja. Praŭda, jość adzin niuans. Kali ŭ kvatery bolš adnaho pakoja, to paprostu možna kazać pra toje, što vy robicie kuchniu-stałovuju. U hetym vypadku možna abyjścisia bieź pieraharodak u arcy.

Kali razietki ŭ kvatery raźmieščanyja niazručna, pryhatujciesia da taho, što pieranieści ich budzie niatanna i niaprosta. Na majstravańnie sistem enierhazabieśpiačeńnia, tak ža, jak aciapleńnia, vientylacyi i niekatorych inšych, patrabujecca dazvoł u vykankamie. Układvać pravodku mohuć tolki śpiecyjalisty, u jakich jość dazvoł na praviadzieńnie padobnych rabot. Ź imi treba zaklučyć adpaviednuju damovu. Sapraŭdy hetak ža spatrebicca damova na ažyćciaŭleńnie techničnaha nahladu z arhanizacyjaj, u jakoj jość adpaviedny dazvoł. U kancy pryjomačnaja kamisija pavinna skłaści akt pryjomki vykananych rabot pa pieramajstravańni i pierapłaniroŭcy.

Schiema zamieny radyjataraŭ i ŭstaloŭki kandycyjanieraŭ prykładna takaja ž. Ale ŭličycie, što žyllovyja arhanizacyi rekamiendujuć macavać źniešni błok kandycyjaniera na bałkonie ci łodžyi, a nie vynosić jaho na ścianu doma, kab nie psavać źniešni vyhlad fasada. Kali praihnarujecie hetuju rekamiendacyju, u dazvole na ŭstaloŭku kandycyjaniera, chutčej za ŭsio, admoviać.

Nahadajem, hetym ža dakumientam vyznačany paradak atrymańnia dazvołu ŭstaloŭki na dachach i fasadach šmatkvaternych žyłych damoŭ indyvidualnych anten i inšych kanstrukcyj u adnosinach da jurydyčnych asob i indyvidualnych pradprymalnikaŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?