General Motors płanuje źbirać pad Minskam aŭtamabili Opel Corsa 20

Kampanija General Motors i biełaruska-brytanskaje pradpryjemstva «Junison» padpisali 13 červienia ramačnaje pahadnieńnie ab zborcy madelaŭ aŭtamabilaŭ General Motors na vytvorčych mahutnaściach SP ZAT «Junison».

Podpisy pad dakumientam pastavili prezident i dyrektar-kiraŭnik kampanii «Dženierał Motarz Rasija i SNH» Džejms Bovienzi i hienieralny dyrektar SP ZAT «Junison» Dźmitryj Jahoraŭ.

Jak paviedamili BiełaPAN na pradpryjemstvie «Junison», pieršyja aŭtamabili syduć z kanviejera viasnoj 2014 hoda. Aŭtamabili buduć vyrablacca dla ŭsich rynkaŭ krain Mytnaha sajuza, a ich košt budzie vyznačany bližej da pačatku vypusku.

Pieršaj madellu, zborka jakoj pačniecca ŭ 2014 hodzie, budzie Opel Corsa — adzinaja z masavych madelaŭ General Motors, jakaja pradajecca ŭ Rasii i vytvorčaść jakoj jašče nie była łakalizavana. Płanujecca vypusk usich prapanavanych siońnia na rasijskim rynku madyfikacyj Opel Corsa, u tym liku troch- i piacidźviernych viersij. Vyklučeńnie składzie tolki viersija OPC, vytvorčaść jakoj zastaniecca pakul u Zachodniaj Jeŭropie.

Kampanija «Junison» pry niepasrednym udziele śpiecyjalistaŭ General Motors praviadzie zakupku, mantaž i naładku ŭsiaho nieabchodnaha abstalavańnia dla pačatku zborki novaj madeli, a taksama arhanizuje navučańnie piersanału pryncypam vytvorčaści i kantrolu jakaści, pryniatym na zavodach General Motors pa ŭsim śviecie.

Opel Corsa — nievialiki aŭtamabil, što vypuskajecca General Motors z 1982 hoda, najbolš pradajecca z madelaŭ marki Opel. Opel Corsa tasam vypuskajecca pad markami Vauxhall Corsa (u Vialikabrytanii) i Chevrolet Corsa (u Paŭdniovaj Amierycy i Azii).

Sumiesnaje pradpryjemstva ZAT «Junison» raźmieščana ŭ vioscy Abčak za 10 km ad Minska. Było zasnavana ŭ 1996 hodzie jak biełaruska-brytanskaje sumiesnaje pradpryjemstva Ford Union, a ŭ 2000 hodzie pieraŭtvorana ŭ SP ZAT «Junison». Za pieryjad dziejnaści ažyćciaŭlała zborku šerahu aŭtamabilnych marak, uklučajučy Ford, KIA, Samand.

U 2010 hodzie SP ZAT «Junison» rašeńniem Kamisii Mytnaha sajuza było ŭklučana ŭ pieralik subjektaŭ haspadarańnia MS, jakija atrymali prava pracavać u režymie pramysłovaj zborki i impartavać detali na terytoryju Mytnaha sajuza pa lhotnaj staŭcy.

Alaksiej Areška, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH