U aficyjnych dachodach biełarusaŭ usio mienšuju dolu zajmaje zarobak, a ŭsio bolšuju — sacyjalnyja vypłaty. Dola dziaržaŭnych vypłataŭ nasielnictvu (pensii, dapamohi) vyrasła na 1,6 pracenta ŭ paraŭnańni ź minułym hodam. Nakolki tryvałaja hetaja tendencyja i čym jaje možna patłumačyć?Čamu biełaruski biudžet (u paraŭnańni ź inšymi krainami) biare na siabie nadta šmat abaviazańniaŭ i ci ŭsie ź ich jon vykonvaje? Na hetyja pytańni adkazvaje ekanamist Michał Zaleski.
— Nakolki tryvałaja heta tendencyja, što ŭ dachodach biełarusaŭ źmianšajecca dola zarobku, i ci možna prasačyć dynamiku hetych źmienaŭ?
— Hetaja ličba zaležyć ad troch čyńnikaŭ. Pieršaje — rost kolkaści pensijaneraŭ, jaki ŭvieś čas praciahvajecca. Druhoje — vahańni zarobku, nie abumoŭlenyja ekanamičnymi pryčynami. To zachočuć 500 dalaraŭ zrabić, to zarobak panižajecca. I kali jon pierastaje raści, to pensija dy inšyja vypłaty znoŭ imknucca na svaje vysokija pazycyi.
I treciaje — heta ŭlik realna zaroblenych hrošaj. U Biełarusi kožny treci rubiel nie abkładzieny padatkam i zarobleny ŭ šeraj sfery. Plus vielmi šmat ludziej pracuje za miažoj. Pavodle statystyki, jany pieraviali ledź nie miljard dalaraŭ letaś u Biełaruś. Hetyja hrošy ŭ bolšaj svajoj častcy nia ŭličanyja jak zarobak.
— Jak biełaruskaja statystyka dachodaŭ vyhladaje ŭ paraŭnańni ź inšymi eŭrapiejskimi krainami?
— Tam zarobki składajuć značna bolšuju dolu ŭ sabiekošcie pradukcyi. Biełaruskamu zarobku ciažka paraŭnoŭvacca z eŭrapiejskim jašče i tamu, što, jak i daŭniej, biełaruskaja dziaržava aryjentuje na toje, što čałaviek pavinien šmat atrymlivać z hramadzkich fondaŭ sacyjalnaha spažyvańnia.
— Liberalnyja ekanamisty časta krytykujuć hety biełaruski padychod, kali biudžet biare na siabie nadta šmat taho, što ŭ inšych krainach dziaržava addała pryvatniku.
— Hetaja tendencyja — maksymizavać dolu hrošaj, jakaja akumulujecca ŭ biudžecie — adroźnivaje Biełaruś ad inšych krainaŭ. Tak, kab usio zhaniali ŭ centar — takoha niama nidzie. Na Zachadzie bolš samastojnyja i zamožnyja miascovyja biudžety.
Ale biada nia tolki ŭ tym, što hrošy centralizujucca, a ŭ tym, jak vykonvajecca ich raźmierkavańnie. My bačym, što ŭstojliva finansujecca najpierš siłavy blok, ale niedafinansavanyja adukacyja, medycyna. Nibyta im hrošy vydzialajucca ŭ poŭnym abjomie, ale hety zaplanavany abjom taki mizerny, što my vyhladajem vielmi słaba ŭ hetych sferach.
