Supracoŭniki Frunzienskaha RUUS Minska zatrymali padazravanaha ŭ hrabiažy z apteki na vulicy Žynoviča, 11. Va ŭstanaŭleńni asoby złamyśnika sadziejničali hramadzianie.
Nahadajem, napad byŭ učynieny viečaram 3 červienia. Prykładna ŭ 19.00 kala apteki chadziŭ małady čałaviek, jaki, niahledziačy na ciopłaje nadvorje, achutvaŭ nižniuju častku tvary šalikam. Dačakaŭšysia, kali ŭ aptecy nie było pakupnikoŭ, a farmaceŭt vyjšła z-za pryłaŭka da vitryny, małady čałaviek naciahnuŭ palčatki i chutka ŭvajšoŭ unutr. Jon paprasiŭ špryc, a kali žančyna nakiravałasia za tavaram, kinuŭsia da kasy i vychapiŭ hrošy.
Siamidziesiacihadovaja farmaceŭt pasprabavała zabrać z ruk rabaŭnika vyručku, ale hrošy ŭpali na padłohu. Złamyśnik padabraŭ 1,6 młn. rubloŭ i ŭciok.Narad milicyi prybyŭ apieratyŭna, byŭ arhanizavany pošuk rabaŭnika u najbližejšych kvartałach, adnak zatrymać jaho pa haračych śladach nie ŭdałosia.
Kamiera nazirańnia zachavała fota złamyśnika. Videa było pakazana ŭ internecie i pa telebačańni.
Jak skazali va ŭpraŭleńni kryminalnaha vyšuku HUUS, u milicyju pastupiła niekalki telefanavańniaŭ ad tych, chto ličyŭ, što zmoh paznać złamyśnika.Usie hetyja źviestki byli pravierany. U vyniku supracoŭnikami adździeła kryminalnaha vyšuku Frunzienskaha RUUS sumiesna z kalehami z 8-j rotaj pałka PPSM HUUS byŭ ustanoŭleny padazravany va ŭčynieńni złačynstva — 29-hadovy niepracoŭny raniej sudzimy minčanin.
Jon zatrymany i źmieščany ŭ izalatar časovaha ŭtrymańnia. Pravodziacca śledčyja dziejańni.