Pa fakcie parušeńnia praviłaŭ utrymańnia miadźviedziaŭ na terytoryi vučebna-praktyčnaha centra pradpryjemstva «Maładziečanskija elektrasietki» pačaty administracyjny praces,
paviedamiła namieśnik načalnika ŭpraŭleńnia bijałahičnaj i łandšaftnaj raznastajnaści Ministerstva pryrodnych resursaŭ i achovy navakolnaha asiarodździa Natalla Žarkina. Pavodle jaje słoŭ, zaraz vyvučajecca stupień viny słužbovych asob.
Nahadajem, miadźviedziaŭ, jakija ŭtrymlivalisia ŭ nienaležnych umovach, u Maładziečanskim rajonie dva tydni tamu vypadkova ŭbačyli biełaruskija fatohrafy.
Jany raspaŭsiudzili ŭ internecie zdymki i videarolik, na jakich było bačna, što miadźviedzi žyvuć u nievialikim valjery, a na ich šerści kavałki brudu. U vučebna-praktyčnym centry Maładziečanskich elektrasietak partału tut.by paviedamili, što para miadźviedziaŭ była nabyta šeść hadoŭ tamu ŭ Minskim zaaparku, a ŭmovy ich utrymańnia pahoršylisia hetaj viasnoj paśla naradžeńnia miedźviedzianiaci, jakoha nieabchodna było aharadzić ad miadźviedzia-samca, a heta abciažarvaje prybirańnie valjera.

Pavodle słoŭ Žarkinaj, padčas pravierki, jakuju pravioŭ Minski abłasny kamitet pryrodnych resursaŭ i achovy navakolnaha asiarodździa razam ź vieterynarnaj słužbaj, byli vyjaŭleny parušeńni patrabavańniaŭ pastanovy Minpryrody № 16 ad 27 lutaha 2007 hoda ab transparciroŭcy, utrymańni i raspłodžvańni dzikich žyvioł u niavoli. U pryvatnaści, pamiery kletak dla miadźviedziaŭ nie adpaviadali normam, unutry valjeraŭ nie prybiralisia adchody žyćciadziejnaści žyvioł.

Jak adznačyła namieśnik načalnika Maładziečanskaj rajonnaj vieterynarnaj stancyi Hanna Łazar, na 10 červienia sanitarny stan kletak byŭ zdavalnialnym, karmleńnie miadźviedziaŭ adpaviadała sanitarna-vieterynarnym normam. «Žyvioły čystyja, kletki padasłany apiłkami, u ich staić vada dla kupańnia. Žyvioły aktyŭnyja, dobra jaduć, šerść choć i nie bliskučaja, ale hładkaja, biez abłysieńnia, zuby ŭ narmalnym stanie. Miadźviedzica karmiła miedźviedziania, małaka ŭ jaje dastatkova. Dziciania taksama aktyŭnaje», — skazała Łazar.

Na minułym tydni pradpryjemstva padało ŭ Minpryrody dakumienty na rehistracyju narodžanaha miedźviedzianiaci. Pavodle słoŭ Žarkinaj, kali Maładziečanskija elektrasietki zmohuć zabiaśpiečyć žyviołam dastojnyja ŭmovy ŭtrymańnia, to miadźviedzi zastanucca ŭ ich.

«My vielmi ŭdziačnyja hramadskaści, jakaja svoječasova ŭbačyła fakt nienaležnaha staŭleńnia da žyvioł», — skazała Žarkina. Pavodle jaje słoŭ, chacia pryrodaachoŭnyja słužby pravodziać pravierki terytoryj, na jakich utrymlivajucca žyvioły, «uvaha hramadskaści stymuluje da dziejańniaŭ terytaryjalnych orhanaŭ i dazvalaje zabiaśpiečyć žyviołam naležnaje ŭtrymańnie».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?