Litaralna zaŭtra adbudziecca ŭznaharodžańnie pieramožcaŭ konkursu «Pres-fota Biełarusi — 2013» — aŭtaraŭ najlepšych presavych fotazdymkaŭ minułaha hoda, abranych mižnarodnym žury. Być biełaruskim fatohrafam u našyja časy — sprava niaprostaja. 17 krasavika Ašmianski sud pryznaŭ ekstremisckimi albomy «Pres-fota Biełarusi — 2011». Škodnymi byli pryznanyja navat fota pryrody i słoikaŭ z hrybami. My parazmaŭlali z aŭtarami «ekstremisckich» zdymkaŭ.
* * *
«Pres-fota Biełarusi» — konkurs fatohrafaŭ, jakija pracujuć u śfiery miedyja. Byŭ zasnavany ŭ 2009 hodzie ajčynnymi fotareparciorami. Pravodzicca štohod. U konkursie biaruć udzieł supracoŭniki jak dziaržaŭnych, tak i niedziaržaŭnych ŚMI.
U 2013 hodzie arhkamitet atrymaŭ bolš za 2500 konkursnych zdymkaŭ ad rekordnaj kolkaści udzielnikaŭ — 114-ci. Pieramožcy vyznačajucca ŭ 9-i rubrykach — «Naviny», «Paŭsiadzionnaje žyćcio», «Sport», «Repartažnyja partret», «Pastanovačny partret», «Mastactva i zabavy», «Pryroda», «Tradycyi» i «Mabiłahrafija». U kožnaj naminacyi ŭznaharodžvalisia jak adzinkavyja zdymki, tak i sieryi rabot.