Bakterycydnyja jakaści srebra byli dobra viadomyja jačše z antyčnych časoŭ. Srebra praciahvała šyroka vykarystoŭvacca ŭ miedycynie amal da siaredziny XX st., kali jaho zamianili bolš sučasnyja srodki z navukova dakazanaj efiektyŭnaściu.
Adnak niadaŭniaje daśledavańnie hrupy navukoŭcaŭ pad kiraŭnictvam Džejmsa Kolinsa z Bostanskaha univiersiteta ŭ Masačusetsie pakazała, što srebra moža značna ŭzmacnić efiekt antybijotykaŭ, jakich z kožnym hodam raspracoŭvajuć usio mieniej i da jakich usio aktyŭniej prystasoŭvajucca škodnyja mikraarhanizmy, piša sajt nature.com.
Vyniki daśledavańnia kamandy Džejmsa Kolinsa pakazvajuć, pryjom srebra razam z antybijotykami šmatkroć pavyšaje zdolnaść apošnich źniščać hramadmoŭnyja bakteryi— mikraarhanizmy z dvajnoj kletačnaj miembranaj, što robić ich bolš ustojlivymi da antybijotykaŭ i antyciełaŭ čałavieka.
Adnak iony srebra atakujuć kletačnuju miembranu bakteryj, što robić bakteryi biezabaronnymi pierad antybijotykami. Taksama iony srebra ŭmiešvajucca ŭ praces mietabalizmu bakteryi, što vyklikaje pieravytvorčaść taksičnych dla samoj bakteryi vytvornych kisłarodu.
Navukoŭcy śćviardžajuć, što antybijotyki z dapamohaj nievialikaj kolkaści ionaŭ srebra mohuć źniščyć ad 10 da 1000 razoŭ bolš bakteryj čym biez dapamohi mietała.Pry hetym pavieličeńnie prachodnaści miembrany bakteryj nie dazvalaje im vyvodzić antybijotyki nazad: heta «adklučaje» miechanizm supraciŭlalnaści mikraarhanizmaŭ lekam.
Treba zaŭvažyć, što krytyki daśledavańnia ŭžo nahadali Kolinsu pra taksičnuju niebiaśpiečnaść srebra, jakoje adnosicca da ciažkich mietałaŭ.Adnak navukoviec śćviardžaje, što padčas vyprabavańnia na myšach dobrych vynikaŭ udałosia dasiahnuć pry vykarystańni nietaksičnych dozaŭ srebra.
Da taho ž Kolins ličyć, što možna stvaryć nietaksičny i biasškodny anałah, jaki budzie vałodać takim samym efiektam na bakteryi, jak i srebra.