Namieśnik hienieralnaha prakurora Biełarusi Alaksiej Stuk na pres-kanfierencyi 25 červienia admoviŭsia adkazvać na pytańnie, ci pieravystaŭlena ŭžo abvinavačańnie Andreju Hajdukovu. Nahadajem, małady čałaviek abvinavačvajecca ŭ zdradzie dziaržavie, sud nad im prachodzić u Viciebsku ŭ zakrytym režymie.

«Sprava słuchajecca ŭ zakrytym režymie. Pra chod pracesu ničoha nie mahu skazać», — zajaviŭ namieśnik hienprakurora.

Nahadajem, pra toje, što Hajdukovu moža być pierakvalifikavana abvinavačańnie, 19 červienia žurnalistam zajaviŭ staršynia KDB Biełarusi Valeryj Vakulčyk. Śledstva pa spravie maładoha čałavieka viałosia mienavita ŭ hetym viedamstvie.

«Nie fakt, što Hajdukoŭ pojdzie pa 356-m artykule», — skazaŭ Vakulčyk. Jon zapeŭniŭ pradstaŭnikoŭ ŚMI ŭ tym, što paśla vyniasieńnia rašeńnia suda jany atrymajuć usiu nieabchodnuju infarmacyju pra praces, za vyklučeńniem «zakrytych pytańniaŭ». «Terminy vyniasieńnia rašeńnia budzie vyrašać sud. U mianie niama sumnieńniaŭ, što ŭsio budzie abjektyŭna», — zajaviŭ jon.

23-hadovy Andrej Hajdukoŭ, apieratar navapołackaha NPZ «Naftan», lidar niezarehistravanaha hramadskaha abjadnańnia «Sajuz maładych intelektuałaŭ», byŭ zatrymany 8 listapada 2012 hoda. Pavodle viersii śledstva — «u momant zakładki tajnika sa źviestkami, jakija cikaviać zamiežnyja śpiecsłužby». Paśla zatrymańnia jaho pieraviali ŭ śledčy izalatar KDB u Minsk. Zatym maładoha čałavieka nieadnarazova pieravozili ź Minska ŭ Viciebsk i nazad. Zhodna z artykułam 356 Kryminalnaha kodeksa (zdrada dziaržavie ŭ formie praviadzieńnia ahienturnaj dziejnaści) Hajdukovu pahražaje ad 7 da 15 hadoŭ pazbaŭleńnia voli.

Na dumku pradstaŭnikoŭ apazicyi i pravaabaroncaŭ, pryčynaj zatrymańnia Hajdukova stała jaho aktyŭnaja hramadskaja dziejnaść. Napiaredadni pačatku pracesu pravaabaroncy i pradstaŭniki hramadskaści źviartalisia da ŭład z prośbaj zrabić sudovy praces adkrytym, adnak ich prośba nie była pačuta.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?