Pra heta havorycca ŭ novym dakładzie pravaabarončaj arhanizacyi Human Rights Watch.

Mnohija ź ich, u tym liku sotni tysiač kačeŭnikaŭ, byli zahnanyja ŭ tak zvanyja sacyjalistyčnyja vioski.

Jak havorycca ŭ dakładzie, meta pierasialeńnia — bolš strohi dziaržaŭny kantrol nad nasielnictvam Tybieta.

Kitajskija ŭłady admaŭlajuć toje, što ŭ krainie pravodzicca palityka masavaha pierasialeńnia.

Na spadarožnikavych zdymkach Google, apublikavanych pravaabaroncami, bačnyja ślady masavych razbureńniaŭ tybieckich viosak i źjaŭleńnie na ich miescy pravilnych šerahaŭ novych budynkaŭ.

«Ułady nakiroŭvajuć novyja bryhady partyjcaŭ u kožnuju viosku Tybieckaj aŭtanomnaj akruhi», — kaža Nikałas Biekielin, supracoŭnik Human Rights Watch.

«Hetym kamunistam, jakich nakiroŭvajuć ŭ vioski, zahadana žyć i pracavać siarod tybietcaŭ, dzialić ź imi ježu i infarmavać ułady pra ich nastroi i łajalnaść», — kaža jon.

Ułady KNR uvieś čas śćviardžajuć, što ŭ Tybiet układajucca miljardy dalaraŭ dziela palapšeńnia stanu ekanomiki rehijonu i pavyšeńnia ŭzroŭniu žyćcia tybietcaŭ.

Adnak napružanaść u hetym rajonie zachoŭvajecca.

Za apošnija čatyry hady nie mienš za 117 tybietcaŭ spalili siabie na znak pratestu suprać kitajskaha kiravańnia, zahinuła 90 čałaviek.

Mnohija tybietcy pratestujuć suprać prytoku etničnych kitajcaŭ u Tybiet, a taksama padaŭleńnia svajoj relihijnaj svabody.

U adkaz kitajskija ŭłady ŭzmacniajuć u Tybiecie miery palicejskaha kantrolu. U haradach viadziecca strohi ŭlik patencyjnych dysidentaŭ, jakija prypisanyja da asobnych pastarunkaŭ.

Novaja sistema palicejskaha kantrolu pryznačanaja dla praduchileńnia masavych pratestaŭ, jakija ŭ sakaviku 2008 hoda achapili centr Łchasy, stalicy Tybieta.

Z pačatku 2000-ch kala 300 tysiač kačeŭnikaŭ-pastuchoŭ byli pierasielenyja ŭ pasiołki haradskoha typu, a da kanca 2013 hoda ŭłady płanujuć prymusić da asiełaha ładu žyćcia jašče 113 tysiač kačeŭnikaŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?